Modelja e njohur shqiptare, Vesa Vllasaliu ka hedhur sërish akuza të rënda ndaj ish partnerit të saj, futbollistit Mërgim Berisha. Përmes një postimi në Twitter, Vesa ka shkruar se sulmuesi e kishte nxjerrë nga shtëpia vetëm dy muaj para martesës që kishin planifikuar.

“3 vite lidhje, rreth 2 vite fejesë, jetuam 1.5 vjet bashkë dhe më nxori nga shtëpia 2 muaj para dasmës sepse faktet ishin shumë të rënda për të. 3 javë pasi lidhja jonë përfundoi, njerëzit e panë atë me dikë tjetër dhe tani ai është hapur në rrjetet sociale. Ju lutem më lini të qetë!”, ka shkruar ajo.

Në muajin mars, Vllasaliu ngriti padi ndaj futbollistit në një gjykatë në Anadoll. Në padi pretendohet se Berisha ka ushtruar dhunë ndaj saj dhe e ka nxjerrë me forcë nga banesa në Umraniye, ku jetonin së bashku. Sipas saj, sulmuesi kishte urdhëruar rojet e sigurisë që të mos e lejonin atë që të hynte më në shtëpi.