Honda prezantoi para disa ditësh modelin Prologue, një SUV i madh që pritet të dalë në rrugë në vitin 2024. Ajo është projektuar në Honda Design Studio në Los Angeles dhe përmban të ashtuquajturën gjuhë të dizajnit “neo-rugged”. Fotot paraqesin Prologue në rrota 21 inç. Dekorimi i Prologue do të quhet “Elite”.

Për më tepër, mbishkrimi AWD në anën e pasme sugjeron se një sistem me dy motorë do të jetë i disponueshëm në të paktën disa modele. Sa i përket pjesës së brendshme, ai është ndërtuar rreth dy ekraneve të mëdhenj, ekrani i grupit të instrumenteve është saktësisht 11 inch ndërsa ai i informacionit argëtues është pak më i madh 11.3 inch.

Lajmi i mirë është se kontrollet e klimës së bashku me veçoritë e tjera standarde funksionojnë nëpërmjet butonave fizikë. Deri më tani, nuk ka asnjë informacion mbi sistemin e lëvizjes, baterinë, peshën, etj. Më shumë specifika priten në muajt e ardhshëm.

Rikujtojmë se Honda Motor Co po planifikon të nxjerrë në treg më shumë se 10 modele të motoçikletave elektrike në mbarë botën përgjatë tre viteve të ardhshme, si pjesë e synimit të prodhuesit japonez për të arritur neutralitetin e karbonit për motoçikletat deri në vitet 2040.

Sipas mediave të huaja, Honda, e cila dominon biznesin global të motoçikletave, përballet me sfida në kalimin në elektricitet, me motoçikletat jashtëzakonisht të njohura në ekonomitë në zhvillim. Lëvizja drejt elektricitetit mund të nënkuptojë automjete më të rënda dhe çmime më të larta, duke rritur barrierat për hyrjen për konsumatorët e tregut në zhvillim.