Giorgia Meloni, e cila pritet të jetë kryeministrja e ardhshme e Italisë, sfidoi partnerët e koalicionit të krahut të djathtë, duke thënë se qeveria e saj e re do të jetë pro NATO-s e plotësisht pjesë e Europës. Deklarata erdhi pasi aleati i saj konservator Silvio Berlusconi përsëriti simpatinë për presidentin rus Vladimir Putin dhe akuzoi presidentin ukrainas Volodymyr Zelenskyy për shkaktimin e luftës.

Në një deklaratë të formuluar ashpër, Meloni u shpreh se “çdo parti që nuk pajtohet me linjën e saj të politikës së jashtme nuk duhet të bashkohet me qeverinë”, e cila do të fillojë nga puna javën e ardhshme.

Italia me ne në qeveri nuk do të jetë kurrë lidhja e dobët e Perëndimit.

Meloni e ka mbrojtur me vendosmëri Ukrainën që kur Rusia nisi pushtimin e vendit më 24 shkurt dhe ka mbështetur sanksionet perëndimore kundër Moskës.

Për një gjë kam qenë, jam dhe do të jem gjithmonë e qartë. Unë synoj të drejtoj një qeveri me një linjë të qartë dhe të drejtë të politikës së jashtme. Kushdo që nuk është dakord me këtë gur themeli, nuk mund të jetë pjesë e qeverisë.

86-vjeçari Berlusconi, mik i vjetër i Putinit, në një regjistrim audio të publikuar të martën, u zbuloi anëtarëve nga partia e tij Forza Italia se ishte në kontakt me presidentin rus dhe ka shkëmbyer “letra të ëmbla” e dhurata.

Në një regjistrim të dytë, të publikuar dje nga agjencia e lajmeve LaPresse, Berlusconi tha se Ukraina prishi një marrëveshje paqeje të vitit 2014, akord i krijuar për t’i dhënë fund një lufte separatiste nga rusisht-folësit në rajonet e Ukrainës lindore, Donetsk e Luhansk.

Duke përsëritur akuzat e bëra nga Putini, të cilat janë mohuar nga Ukraina, Berlusconi tha se Zelenskyy e përkeqësoi situatën shumë më tepër kur erdhi në pushtet në vitin 2019. Berlusconi përsëriti gjithashtu një pohim se Putini ishte përkulur ndaj presionit të brendshëm dhe kishte pushtuar Ukrainën vetëm për të krijuar një qeveri të re “me njerëz të mirë me logjikë”.

Të martën, pasi u publikua regjistrimi i parë, Forza Italia tha se pikëpamja e Berlusconit për luftën ishte “në përputhje me pozicionin e Europës dhe Shteteve të Bashkuara”.

Megjithatë, kundërshtarët janë mbështetur te regjistrimet për të akuzuar Berlusconin për minimin e besueshmërisë së Melonit. Enrico Letta, kreu i Partisë Demokratike të qendrës së majtë:

Komentet e Berlusconit janë shumë të rënda dhe të papajtueshme me qëndrimet italiane e europiane.