Sonte në orën 20:45, Kombëtarja Shqiptare e Futbollit zhvillon një miqësore “luksi”, ndërsa përballë do të ketë Italinë. “Air Albania” pret këtë supermiqësore, për të cilën ka shumë interes nga tifozeria “kuqezi”. Të gjitha biletat për këtë takim janë shitur. Që nga ndeshja ndaj Polonisë më 12 tetor 2021, kjo është e para herë që stadiumi do të jetë i mbushur në një ndeshje të Kombëtares.

Policia e Tiranës ka marrë një plan masash për ruajtjen e rendit e të sigurisë, para, gjatë dhe pas zhvillimit të ndeshjes miqësore të futbollit midis Shqipërisë dhe Italisë.

Policia e Tiranës informon se do të ketë bllokime të disa segmenteve rrugore gjatë kalimit të tifozëve, nga ora 18:00 deri në përfundim të aktivitetit.

Akset që do të bllokohen janë: rruga “Lekë Dukagjini”, përreth stadiumit; rruga “Dervish Hima”; rruga “Gjergj Filipi”; rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”. Sheshi “Nënë Tereza” nuk do të ketë bllokime të lëvizjes.

Po në zbatim të planit të masave, do të ushtrohen kontrolle ndaj tifozëve, para hyrjes në stadium, për sende të kundërligjshme (si armë, sende të forta, bidonë uji, çadra, çelësa metalikë, lëndë piroteknike etj).

Policia informon se çdo tifoz duhet të jetë i pajisur me dokument identifikimi. Nuk do të lejohen të futen në stadium, persona të papajisur me dokument identifikimi, si dhe fëmijët nën moshën 16 vjeç, të pashoqëruar nga prindi apo kujdestari.

Gjithashtu, nuk do të lejohen të futen në stadium tifozët, që në aktivitete të mëparshme sportive, janë të identifikuar nga Policia, si problematikë.