Twitter do të angazhohet për eliminimin e përmbajtjeve terroriste dhe ekstremiste në internet. Kështu tha presidenti francez, Emmanuel Macron. Në një vizitë në SHBA, shefi i Elizesë u takua me pronarin e ri, Elon Musk, e pati “një takim dhe diskutim të qartë e të ndershëm”, sipas vetë fjalëve të presidentit francez. Macron tha se “Elon Musk konfirmoi pjesëmarrjen e Twitter-it në nismën “Christchurch Call”, të nisur pas sulmeve terroriste në Zelandën e Re”. Macron theksoi:

Nuk ka vend për përmbajtje terroriste dhe të dhunshme ekstremiste askund!

Po ashtu, bëhet e ditur se Macron dhe njeriu më i pasur i botës, gjithashtu folën lidhur me “politikat transparente të përdoruesve, përforcimin e konsiderueshëm të moderimit të përmbajtjes e mbrojtjen e lirisë së fjalës”. Shefi i Elizesë shtoi:

Duhet të bëhen përpjekje nga Twitter-i për t’iu përmbajtur rregulloreve europiane.

Që nga koha e blerjes së Twitter-it nga njeriu më i pasur i botës, Elon Musk ka pasur shqetësime të përhapura se më shumë gjuhë urrejtjeje dhe abuzime mund të përfundojnë në platformë nën drejtimin e tij. Kjo edhe pas shkurtimeve të mëdha të vendeve të punës që ai zbatoi. Vetë Musk ka ngritur të tilla shqetësime, me kritika të përsëritura se Twitter e kufizoi shumë lirinë e fjalës në platformë.

E nisur nga Emmanuel Macron dhe kryeministrja e Zelandës së Re, Jacinda Ardern në vitin 2019, nisma “Christchurch Call” pa liderët botërorë të bashkohen me kompanitë e teknologjisë, përfshirë Facebook, YouTube e Google për të trajtuar përmbajtjen terroriste dhe ekstremiste në internet.

Nisma mban emrin e qytetit të Zelandës së Re, ku një person i armatosur vrau 51 persona në sulmet e përgjakshme në dy xhami, në vitin 2019. Akoma edhe më i rëndë ishte fakti se në mënyrë të drejtpërdrejtë, ai transmetoi sulmet në Facebook për 17 minuta përpara se kompania e medias sociale të hiqte transmetimin.