Moti i keq pezullon lundrimin e mjeteve të vogla në katër porte të vendit!
Pezullohet lundrimi për mjetet e vogla në portet e Durrësit, Vlorës, Sarandës e Shëngjinit. Drejtoria e Përgjithshme Detare për shkak të motit të përkeqësuar informon mbi situatën detare në porte dhe në radat e vendit.
DPD thekson se, për mjetet e vogla dhe anijet e peshkimit është i pezulluar lundrimi në Portin e Durrësit, Vlorës, Sarandës dhe Shëngjinit deri në përmirësim të situatës.
Në portin Durrës tragetet që operojnë në linjën Durrës-Bari-Durrës janë nisur nga porti i Durrësit trageti Rigel III dhe GNV, kurse nga porti i Barit në drejtim të portit të Durrësit janë nisur tragetet Rigel VII dhe Marina te cilat priten që të mbërrijnë rreth orës 11.
Gjithashtu, në portin e Vlorës për linjën Vlorë-Brindisi-Vlorë është nisur nga Porti i Brindisit trageti Ioan Star dhe pritet që të mbërrijë në portin e Vlorës rreth orës 14:00.
DPD bën të ditur se, në portin e Sarandës anijet pasagjere të linjës Sarandë-Korfuz-Sarandë nuk janë lejuar që nisen nga të dyja anët e porteve.
Në portin e Shëngjinit situata është e qetë dhe pa probleme. Për anijet e peshkimit është pezulluar lundrimi deri në përmirësimin e situatës”, thekson DPD.
Situata meteorologjike detare do te përmirësohet ditën e sotme pasdite, por dita e shtunë do të shoqërohet me erë te fuqishme nga drejtimi J JP me shpejtësi mbi 35 nyje në orë dhe me det me lartësi dallge mbi 4 m.
Përmirësimi i motit do të fillojë ditën e diel datë 22 janar 2023.