Fatkeqësisht bëhet e ditur se ka ndërruar jetë në moshë 84-vjeçare stilisti i njohur japonez Issey Miyake. Miyake “ndërroi jetë mbrëmjen e 5 gushtit”, tha një nga bashkëpunëtorët e tij për AFP në telefon, pa dhënë detaje të mëtejshme. Edhe kanali televiziv publik japonez njoftoi vdekjen e stilistit. I lindur më 22 prill 1938 në Hiroshima (Japonia perëndimore), Issey Miyake ishte 7-vjeç më 6 gusht 1945 kur Shtetet e Bashkuara hodhën bombën e parë atomike në histori në qytetin e tij të lindjes, duke vrarë 140,000 njerëz dhe duke traumatizuar të mbijetuarit për jetën.

Ai mbijetoi, por nëna e tij ndërroi jetë tre vjet më vonë nga rrezatimi. Sapo u diplomua në Universitetin e Arteve të Bukura Tama në Tokio, ai u transferua në Paris për të studiuar në shkollën Chambre Syndicale de la Couture Parisienne. Në Japoni, në vitin 1970, ai filloi një karrierë si stilist mode, i karakterizuar nga kërkimet mbi materialet dhe teknologjitë e reja. Ndër çmimet e ndryshme të marra, ishte edhe çmimi prestigjioz Compasso d’oro në vitin 2014, për krijimin e llambave IN-EI Issey Miyake, të prodhuara për kompaninë italiane Artemide, teknologjikisht të avancuara dhe me konsum të reduktuar.

Funerali i Miyake është bërë tashmë dhe pjesëmarrës kanë qenë vetëm të afërm të tij, ashtu siç ai dëshironte. I njohur për stilimet dhe parfumet e tij inovative, Miyake ndërtoi një markë globale të modës, e cila përfshinte veshjen ikonike të Steve Jobs.

Jobs dikur donte që të gjithë punonjësit e Apple të mbanin uniforma, një qëllim që u ndez pas vizitës së tij në Sony Japoni në vitin 1980. Ai mendoi se zbatimi i së njëjtës ide do të bashkonte të gjithë punonjësit e Apple dhe do të krijonte lidhje. Jaka e zezë ikonë u krijua posaçërisht për Jobs nga stilisti i njohur japonez i modës, Issey Miyake.