Kievi pa energji elektrike, gati opsioni i evakuimit të plotë!
New York Times raporton se Kievi po bëhet gati për evakuim të plotë, nëse plotësisht mbetet pa energji elektrike.
Fjala është për qytetin prej 3 milionë banorëve, e tashmë ekziston plani i plotë për këtë opsion të pabesueshëm, transmeton Telegrafi.
Nga bombardimet ruse tashmë është shkatërruar rreth 40 për qind e infrastrukturës energjetike.
“Nëse Rusia vazhdon me këso sulmesh, është e qartë se mund të mbesim plotësisht pa energji elektrike”, tha Roman Tkachuk, zyrtarë i lartë i qeverisë ukrainase.
Nëpunësve të këtij qyteti i është bërë e ditur se do të kishin rreth 12 orë kohë që përgatiten për largim.
Rusia lëshoi të tjerë dronë kamikazë në infrastrukturë dhe objektiva civile në Ukrainën juglindore. Kjo u bë e ditur sot nga zyrtarë ukrainas, ndërsa pas dëmtimit masiv në rrjetin elektrik, si pasojë e këtij sulmi, miliona ukrainas mbetën pa energji elektrike. Kjo e shtyu presidentin Volodymyr Zelensky që të akuzojë Moskën për “terrorizëm energjetik”.
Ndërkohë, ushtria e Ukrainës shkatërroi tetë dronë Shahed-136 në rajonin jugor të Nikopolit, ndërsa trupat ruse goditën katër vendbanime në të njëjtin distrikt me raketa Grad e zjarr artilerie. Gjithashtu dëmtuan një tubacion gazi e një linjë energjie, përveçse shkatërruan disa objekte banimi.
Zelensky u shpreh:
Më shumë se 10 për qind e popullsisë së paraluftës në Ukrainë ose 4.5 milion banorë, kanë mbetur përkohësisht pa energji elektrike për shkak të sulmeve ruse.
Vetë fakti që Rusia po përdor terrorizmin energjetik, tregon dobësinë e armikut tonë. Ata nuk mund ta mundin Ukrainën në fushëbetejë, kështu që ata përpiqen të thyejnë popullin tonë në këtë mënyrë.