Franca dhe Europa në qendër të agjendës amerikane, Emmanuel Macron edhe në Luiziana!
Në kuadër të vizitës në Amerikë, presidenti francez, Emmanuel Macron ishte edhe në Luiziana, shtet amerikan, historikisht i lidhur me Francën. Kjo për të festuar lidhjet e vjetra kulturore e gjithashtu për të diskutuar politikën e energjisë dhe ndryshimet klimatike. Presidenti Macron u takua me zyrtarë politikë dhe me zonjën e parë Brigitte, shëtiti në lagjen historike franceze të Nju Orlinsit, në zemër të qytetit, duke ndaluar për të folur e shtrënguar duart me kalimtarët. Ai ndaloi pranë një grupi muzikor që interpretonte “When the Saints Go Marching In”.
Kjo është e para vizitë e një presidenti francez atje, që kur Valery Giscard d’Estaing udhëtoi në Lafajet e Nju Orlins në vitin 1976. I vetmi president tjetër francez që vizitoi Luizianën ishte Charles de Gaulle në vitin 1960. Itinerari i Macron-it filloi në sheshin Jackson.
Kryebashkiakja LaToya Cantrell e shoqëroi në Koleksionin Historik të Nju Orlinsit ku Macron diskutoi ndikimet e ndryshimeve klimatike me guvernatorin John Bel Edwards. Presidenti francez u takua edhe me përfaqësues të kompanive energjetike.
Guvernatori Edwards u shpreh:
Mendoj se kjo evidenton një marrëdhënie të veçantë që kemi me Francën. Eshtë historike dhe kulturore.
Demokrati Edwards ka folur hapur për rreziqet e ndryshimeve klimatike në një shtet ku mijëra vende pune janë të lidhura me industrinë e naftës dhe gazit. Ndalesa në Nju Orlins, e bën “shumë emblematik” në përpjekjet e lidhura me klimën.
Macron deklaroi:
Kjo vizitë shtetërore na mundëson të vendosim Francën dhe me Francën Europën, në qendër të agjendës amerikane. Kjo është një gjë e mirë.
Gjatë një takimi të shkurtër, guvernatori dhe Macron nënshkruan një memorandum mirëkuptimi, për të zgjeruar e përmirësuar më tej lidhjet e forta kulturore mes Francës e Luizianës në fushat e ekonomisë, energjisë së pastër dhe mjedisit.
Gjatë vizitës së shefit të Elizesë në Uashington, ai dhe presidenti Joe Biden dolën me një deklaratë të përbashkët duke shprehur shqetësimin e tyre të thellë në lidhje me ndikimin në rritje të ndryshimit të klimës.
Luiziana ka këtë emër për nder të Luigjit të XIV, mbreti i famshëm i Diellit që sundoi Francën për 72 vjet duke filluar nga 1643-shi. Nju Orlins është vendi ku u finalizua Blerja e Luizianës. Akordi transferoi Territorin e Luizianës, që përfshinte pjesën më të madhe të asaj që sot janë pjesa qendrore e Shteteve të Bashkuara, nga Franca tek SHBA-të, në vitin 1803.