Misioni i NATO-s në Kosovë, KFOR, tha sot se mbështet dialogun ndërmjet të gjitha palëve për të zbutur tensionet në veri të vendit. Komandanti i Forcave paqeruajtëse të NATO-s në Kosovë (KFOR), Angelo Michele Ristuccia:

Eshtë e rëndësishme që të gjitha palët e përfshira të shmangin çdo retorikë apo veprim që mund të shkaktojë tensione e të përshkallëzojë situatën. Zgjidhjet duhet të kërkohen përmes dialogut!

Një ditë më parë, në veri të Kosovës janë vendosur dy barrikada të reja. Gjithashtu, një prej tyre u ngrit edhe në anën serbe të kufirit në Merdare. Që prej datës 10 dhjetor, serbët lokalë kanë ngritur barrikada në veri, në shenjë proteste për arrestimin e ish-policit serb të Kosovës, Dejan Pantiç.

Policia e Kosovës thotë se është i paligjshëm bllokimi i rrugës në territorin e Serbisë, që çon drejt pikës kufitare të Merdares. Në një deklaratë, thekson se “një bllokim i tillë ka penguar lëvizjen dhe qarkullimin e lirë të njerëzve e mallrave”. Policia fton qytetarët të shfrytëzojnë pikat e tjera kufitare, me përjashtim të Jarinjës, Bërnjakut e Merdares, deri në njoftimin e radhës.

“Nuk do të bisedojmë e bashkëpunojmë me kriminelët në veri, por do t’i arrestojmë”. Sot në mbledhjen e qeverisë, kryeministri Albin Kurti foli për barrikadat në veriun me shumicë serbe, duke argumentuar se po cënojnë integritetin territorial të Kosovës. Duket se Kurti iu referua nënkryetarit të Listës Serbe, Milan Radoiçiç, i cili u sanksionua nga Uashingtoni e Londra, ndërsa Prishtina e kërkon lidhur me dyshimet se frikësoi dëshmitarët në rastin e njohur si Brezovica.

Kremlini hedh poshtë pretendimet e Prishtinës se Rusia po e shtyn Serbinë të destabilizojë situatën në Kosovën. Moska pretendon se Beogradi po mbron të drejtat e serbëve etnikë. I pyetur mbi deklaratat e ministrit Sveçla se nën ndikimin rus, Serbia po synon të destabilizojë Kosovën, zëdhënësi Dmitry Peskov u shpreh se “është krejtësisht e gabuar” të flitet për ndikim destruktiv të Rusisë.

Ndërkohë, avokati i Dejan Pantiçit, ish-policit serb të akuzuar për akte terroriste në veri të Kosovës njofton se klientit të tij iu zëvendësua masa e paraburgimit me “arrest shtëpie”. Arrestimi i tij u bë shkak që më 10 dhjetor, serbët të vendosnin barrikada, duke bllokuar rrugët për në pikëkalimet kufitare me Serbinë.