E keni pyetur ndonjëherë veten për kuptimin e thumbave të vogla metalike në skajet e xhepave të xhinseve tuaja? Siç zbulohet nga gjigandi i xhinseve “Levi Strauss & Co”, bashkëngjitjet në dukje dekorative në fakt ndihmuan në ‘lindjen’ e xhinsit origjinal blu.

Në një postim në faqen e saj, marka shpjegoi se butonat të njohur si ‘ribatina’ ishin një shtesë revolucionare që ndihmuan të mbanin pantallonat së bashku. Më 20 maj 1873, Levi Strauss, një tregtar bavarez i mallrave që shkoi në San Francisko dhe rrobaqepësi Jacob Davis, morën një patentë për dizajnin. Ideja fillimisht i lindi Jakobit kur gruaja e një punëtori i kërkoi të bënte një palë pantallona, të cilat nuk do të copëtoheshin.

Ribatinat, arsyetoi ai, do të ndihmonin në mbajtjen e veshjeve së bashku në pikat e tendosjes, si qoshet e xhepit dhe bazamenti i butonave. Pavarësisht se thumbat ekzistojnë për më shumë se një shekull, duket se ekzistenca e tyre ende i huton njerëzit. Rikujtojmë, se një palë xhinse 165-vjeçare të krijuara nga Levi Strauss u shitën në një ankand për shifrën rekord të 114 mijë dollarëve.

Pantallonat ishin pjesë e 270 “thesareve” të gjetura në një anije të fundosur, e cila u zbulua së fundmi, e njohur si Anija e Arit, e shkatërruar në fund të Oqeanit Atlantik. Në ankand pati më shumë se 7,500 ofertues nga e gjithë bota të cilët ‘luftuan’ me njëri-tjetrin për të bërë të tyret bizhuteri, këmishët e Brooks Brothers dhe kapakun e kutisë më të vjetër të njohur të dërgesës së thesarit Wells Fargo.