Vrasja e tifozit të AEK-ut, Greqia vijon hetimet e arrestimet/Ende nuk ka një autor!
Vrasja brutale e tifozit të AEK-ut nga huliganë kroatë, policia greke vazhdon hetimet për të zbuluar kush ishte autori. Vijojnë kontrollet në shtëpi, hotele e akomodime AIRBNB, ndërsa në pikat kufitare të Greqisë u arrestuan të tjerë kroatë që tentuan largimin nga vendi fqinj. Një prej tyre u prangos në doganën e Kakavijës.
Të paktën 50 protagonistë apo pjesëmarrës ende janë në kërkim, ndaj forcat e rendit kanë vënë postblloqe në rrugët kombëtare e në kufi. Sot në mëngjes, 94 nga 104 të arrestuar u dërguan në prokurori, të shoqëruar nën masa të rrepta sigurie.
Ende nuk është identifikuar autori i vrasjes që tronditi Greqinë duke goditur 29-vjeçarin, të cilit i çau arterien e njërës dorë, si dhe e qëlloi me mjete të forta kur ishte i shtrirë në tokë.
Ministri i Mbrojtjes së Qytetarit pezulloi shtatë zyrtarë policie e pranoi se bëhet fjalë për një dështim tragjik policor pasi kanë patur informacione që nuk u përdorën. Ai foli për gabime operacionale, të paprecedenta.
Kyriakos Mantzakidis, tifoz i AEK-ut u shpreh:
Si ka mundësi që një karvan prej 100-200 vetësh erdhi nga Kroacia duke udhëtuar 19 orë e në Athinë nuk u mor asnjë masë? Kjo nxjerr në pah se shteti grek u kap sërish në gjumë nga këta njerëz.
Kryeministri kroat, Andrej Plenkoviç i shprehu ngushëllime homologut grek, Kyriakos Mitsotakis për vrasjen e 29-vjeçarit dhe dënoi incidentet e dhunshme.
Pas anulimit të ndeshjes midis AEK-ut e Dinamos së Zagrebit, klubi grek kërkon përjashtimin e atij kroat nga UEFA Champions League, duke e konsideruar “përgjegjës” për sulmin vrasës të tifozëve të tij.
Megjithë masat dhe ligjet e rrepta, kjo është vrasja e tretë që ndodh në Greqi në tre vitet e fundit nga huliganët, ndërsa autoritetet policore janë në gatishmëri të plotë për incidente të mundshme para e pas ndeshjes së futbollit mes Panathinaikosit e Marsejës në kryeqytetin grek, Athinë.