Apple nuk do t’u ofrojë më ndihmë klientëve të produkteve të saj përmes llogarisë Twitter Support në rrjetin social X. Kur përpiqeni të dërgoni një mesazh në llogarinë e Apple Support, llogaria do t’ju udhëzojë të vizitoni faqen e mbështetjes së përgjithshme në faqen e internetit të Apple.

Llogaria do të përgjigjet në mënyrë automatike për çdo mesazh që i dërgoni. “Për të kërkuar ndihmë për një shërbim apo pajisje Apple, ndiqni këtë link dhe ne do të gjejmë opsionin më të mirë shërbimi për ju”,-thuhet në mesazhin e Apple. Ndryshimi do të thotë gjithashtu se Apple Support nuk do të ofrojë më asistencë individuale për klientët që etiketojnë kompaninë në postime.

Rikujtojmë, se mbikëqyrësi holandez i konkurrencës ACM tha së fundmi se kishte refuzuar kundërshtimet nga Apple kundër gjobave prej 50 milionë euro që i kishte dhënë kompanisë për mospërputhje me rregulloret që synojnë kufizimin e pozitës dominuese të App Store të Apple.