Bashkimi Evropian po përballet me vendime historike për reformën dhe zgjerimin. Për të diskutuar mbi këto tema, në Ministrinë e Jashtme Federale u takuan ministrat e jashtëm të vendeve anëtare të BE-së dhe dhjetë vendeve që kërkojnë anëtarësim.

Si do të dukej një Evropë më e madhe dhe më e fortë?

Cili duhet të jetë pozicioni strategjik i BE-së në një botë që po kalon një transformim të madh gjeopolitik? Si mund të mbështeten vendet aspirante në rrugën e tyre drejt anëtarësimit në BE? Këto tema do të jenë në qendër të konferencës me titullin “Një Union më i madh, më i fortë – duke e bërë Bashkimin Evropian të përshtatshëm për zgjerim dhe anëtarët e ardhshëm të përshtatshëm për anëtarësim”.

‘Lufta e agresionit të Rusisë kundër Ukrainës ka krijuar një situatë të re gjeopolitike, një situatë me të cilën Evropa deri tani është përballur me një unitet pothuajse të paprecedentë. Ukrainës, Gjeorgjisë dhe Republikës së Moldavisë i është dhënë tani perspektiva e anëtarësimit në BE, duke u bërë kështu kandidatë potencialë së bashku me gjashtë vendet kandidate të Ballkanit Perëndimor dhe Turqinë. Në të njëjtën kohë, sulmet brutale terroriste të Hamasit ndaj Izraelit të 7 tetorit theksojnë edhe një herë se BE-ja duhet të marrë një qëndrim të unifikuar si një aktor ndërkombëtar dhe të mbetet i aftë për veprim.

Roli i ardhshëm i BE-së si një zë i fortë në arenën globale do të varet nga suksesi me te cilin  BE-ja mund të reformojë veten dhe të përgatitet për raundet e ardhshme të zgjerimit.

Çështja nuk është më nëse do të ndodhë zgjerimi i BE-së, por si dhe kur do të ndodhë kjo.