Pothuajse gjysma e Gjermanisë ka frikë se situata e tyre si konsumatorë do të përkeqësohet, sipas një sondazhi të vënë në dispozicion të DPA-së. Një sondazh i ”Forsa”-s i porositur nga Federata e Organizatave Gjermane të Konsumatorëve (VZBV) tregon se 48% e të rriturve presin që situata e tyre si konsumatorë të përkeqësohet gjatë dekadës së ardhshme.

Një kampion përfaqësues prej 1 003 të rriturish u anketua midis 6-8 nëntorit. Sipas sondazhit, të pyetur se cilat tema kërkojnë aktualisht më shumë veprim politik për konsumatorët, 38% e të anketuarve përmendën furnizimin me energji. 23% aktualisht shohin nevojën më të madhe për veprim me pensionet. Anëtarja e bordit të VZBV-së, Ramona Pop e quajti atë një sinjal alarmi se pothuajse gjysma e njerëzve janë të shqetësuar për të ardhmen. “Në kohë të pasigurta, konsumatorët kanë nevojë për qartësi dhe unitet në vend të konfliktit”,-tha Pop.

Gjermanët janë të pakënaqur si kurrë më parë me qeverinë e koalicionit. Problemet akute për të cilat duhet të kujdeset qeveria janë ekonomia dhe imigrimi, thonë të anketuarit, sipas një sondazhi të ARD-së. Në fund të pushimeve të verës, kancelari Olaf Scholz dhe ministrat e koalicionit u takuan në Meseberg për të folur pa dorashka për problemet e grindjet brenda koalicionit, për stanjacionin, kërcënimin nga recesioni ekonomik dhe se çfarë mund të bëhet kundër kësaj gjendjeje pesimiste brenda ekonomisë gjermane. Temë tjetër ishte edhe performanca e qeverisë së koalicionit me debatet mes ministrave që e kanë dëmtuar imazhin e qeverisë.