Real Madrid vazhdon të mbetet kryefjala e kësaj merkato për emrat e mëdhenj që përfliten se do të transferohen në Madrid. Nuk është më e fshehtë dhe prej kohësh dihet se klubi madrilen është i vendosur në garë për sulmuesin e Paris Saint-Germain, Kylian Mbappe, dhe ka pasur një mori raportesh rreth të ardhmes së tij gjatë dy javëve të fundit. Megjithatë, ka pasur gjithashtu një rritje në thashethemet rreth yllit të Manchester City, Erling Haaland, dhe nuk ka dyshim se nëse Mbappe mbetet në PSG, atëherë Los Blancos do të ndjekin norvegjezin.

Raportet që vijnë nga Spanja gjithmonë duan të theksojnë se edhe nëse Haaland nuk transferohet këtë verë, atëherë dera do të mbetet e hapur për të ardhmen. Ditët e fundit u raportua se nëse Haaland dëshiron të transferohet në Real Madrid, atëherë do të kushtojë rreth 100 milionë euro për ta sjellur sulmuesin në kryeqytetin spanjoll.

Cadena SER raporton se ylli i Real Madridit, Jude Bellingham i është bashkuar përpjekjeve për të bindur Haaland të bëjë transferimin në Santiago Bernabeu. Ish shoku i tij i ekipit në Dortmund ka folur me Haaland për stilin e jetës në Madrid. Megjithatë, Real Madrid duket relativisht i sigurt se sulmuesi francez do të përfundojë në Bernabeu. Pasi Mbappe të jetë atje, transferimi i Haaland do të kërkojë shitjen e Rodrygo dhe Vinicius Junior, të cilët të dy janë me kontrata afatgjata dhe mund të refuzojnë të largohen.