Rrëzohet skela e një pallati në Tiranë, dy të plagosur!
Bie skela e një pallati në ndërtim në Tiranë, dy të plagosur. Një burrë rreth 70-vjeç dhe një grua 45-vjeçe u dërguan në spital pasi mbetën të dëmtuar ndërsa ecnin në trotuar, pranë zonës së ish-Parkut të Autobusëve. Policia nisi hetime për të hedhur më shumë dritë mbi rrethanat. Për veprime të mëtejshme procedurale, policia shoqëroi inxhinierin e firmës, si dhe dy punëtorë.
Tiranë/Informacion paraprak
Më datë 22.01.2024, rreth orës 10:10, në bulevardin “Gjergj Fishta”, janë rrëzuar skelat e nje pallati në ndërtim e sipër, dhe si pasojë janë dëmtuar dy shtetas (kalimtarë) H. L., rreth 70 vjeç, dhe I. Sh., rreth 45 vjeçe.
Dy të dëmtuarit ndodhen në spital, në kujdesin e mjekëve.
Në ambientet e Policisë janë shoqëruar inxhinieri i pallatit, shtetasi K.S., dhe punëtorët N. S., dhe A. P., për veprime të mëtejshme procedurale.
Grupi hetimor ndodhet në vendngjarje dhe po punon për sqarimin e rrethanave të ngjarjes.