Chelsea vazhdon të jetë në krizë rezultatesh pasi pësoi një tjetër humbje të rëndë 4-2 në shtëpi kundër Wolves dhe tashmë nuk ndodhet as në 10 vendet e para të rënditjes. Blutë kanë dështuar këtë sezon me të gjitha standardet e mundshme dhe pyetjet po i bëhen Mauricio Pochettinos. Në janar, u raportua se argjentinasi mund të largohej nga klubi, por një gjë e tillë nuk ndodhi. Todd Boehly dhe bashkëaksionarët e tjerë i besuan atij për ta përfunduar këtë sezon dhe më pas ata do të marrin një vendim bazuar në të gjithë sezonin. Nga ana tjetër, Chelsea përballet me një eksod largimesh në afatin kalimtar të verës, ku shumica e lojtarëve që priten të largohen, do të jenë ata që kanë marrë më pak minuta.

Blutë janë të vendosur të përmirësojnë skuadrën e tyre dhe besojnë se duhet të shesin përpara se të blejnë. Sipas gazetës prestigjoze, Gazzetta Dello Sport, Chelsea do të jetë në gjendje të shesë një ose dy lojtarë në Itali. Megjithatë, kjo gazetë thekson se Milani ka përzgjedhur tre yje të londinezëve për transferimin e tyre në afatin kalimtar të verës. Rossonerët janë të etur për Benoit Badiashile dhe Trevoh Chalobah, së bashku me Carney Chukwuemeka. Nëse Chelsea mund të shesë të tre lojtarët nuk është e qartë për momentin, por Milani do të tentojë të arrijë marrëveshje për ta.