Diabeti është një gjendje e zakonshme që shkakton probleme me nivelet e sheqerit në gjak. Në shumicën e rasteve, sipas National Health Service, mund të shkaktojë simptoma të tilla si etja e tepruar, nevoja për urinim të shpeshtë dhe lodhje. Por një ekspert tani ka thënë se mund të vëreni edhe shenja paralajmëruese në thonjtë tuaj. Duke folur për portalin “The Sun”, Dr. Sarah White, drejtoreshë klinike e asociuar, nga Bupa Health Clinics tha se diabeti mund të çojë në infeksione dhe dobësi të thonjve dhe paralajmëroi ata me këtë gjendje duhet të jenë vigjilentë.

Është vlerësuar se rreth 4.9 milionë njerëz në Mbretërinë e Bashkuar kanë diabet, me 13.6 milionë të cilët janë në një rrezik të shtuar. Prandaj është thelbësore të njihni shenjat që janë më pak të njohura të kësaj gjendjeje shëndetësore. Ndryshimet në thonjtë tuaj mund të jenë një shenjë e diabetit të pa kontrolluar në kohë dhe pa ndërhyrje të hershme, që mund të pasohen nga komplikime të mëtejshme shëndetësore, paralajmëroi Dr. White.

Zverdhje e thonjve

Hulumtimet tregojnë se diabeti mund të ndikojë në proteinat e thonjve tuaj, për shkak të rritjes së shkallës së një procesi të quajtur glikozilim. Dr. White shpjegoi se ky proces sugjerohet të jetë shkaku i zverdhjes së thonjve. Doktoresha tha:

Nëse thonjtë tuaj kanë ndryshuar ngjyrë, kjo mund të nënkuptojë se keni pasur sheqer të lartë në gjak ose diabet të kontrolluar keq për disa kohë.

Infeksionet mykotike

Infeksionet mykotike të thonjve janë gjithashtu të zakonshme tek ata që kanë diabet, tha Dr. White. Kjo për shkak se nivelet e rritura të glukozës mund të shkaktojnë dëmtime graduale të nervave dhe enëve të gjakut. Ajo tha:

Me një furnizim më të dobët të gjakut dhe nivele më të larta të glukozës, infeksionet fungale kanë më shumë gjasa të përhapen. Nivelet më të larta të glukozës do të thotë gjithashtu se çdo bakter rreth këmbëve mund të zhvillohet më shpejt në infeksion.

Shtrat thonjsh i fryrë

Dr. White tha se pacientët me diabet duhet të kontrollojnë shtratin e thonjve të tyre, pasi ata shpesh mund të shfaqin shenja infeksioni. Për shembull, mjekja tha se mund të jenë të fryrë, të kuq dhe mund të ndjeni dhimbje në bazën e thonjve ose në këmbët tuaja. Sarah tha:

Nëse zbuloni se jeni të prirur ndaj infeksioneve të përsëritura të shtratit të thonjve ose kërpudhave, sigurohuni që të kontrolloni nivelet e sheqerit në gjak dhe të kërkoni këshilla mjekësore.

Thonjtë e hollë

Disa nga nervat më të gjata të trupit tuaj shkojnë nga truri juaj te gishtat e këmbëve, kështu që nëse keni dëmtime nervore, mund të keni më pak ndjesi në këmbë, shpjegoi Dr. White. Kjo ka të ngjarë të rrisë rrezikun e traumës së këmbës, pasi ju ecni aksidentalisht në sende dhe dëmtoni thonjtë tuaj. Ekspertja shtoi:

Kur qarkullimi i gjakut rreth këmbëve tuaja reduktohet, kjo mund të bëjë që thonjtë tuaj të bëhen të hollë dhe më shumë gjasa të ndahen ose thyhen. Kur thoi dëmtohet, gishtat janë më të prirur ndaj infeksioneve nga papastërtia ose lagështia.