Pas vizitës së fundit të Papa Françeskut në Kongo, njerëzit u larguan të entuziazmuar nga mesazhi i tij për paqen dhe harmoninë dhe thanë se shpresonin që liderët e Kongos të merrnin parasysh ato fjalë. Pasi Papa foli me një turmë prej 65,000 personash në stadiumin e Martirëve të Rrëshajëve në kryeqytetin e vendit qendror të Afrikës, Kinshasa, njerëzit u shprehën:

Shpresoj se ndoshta vizita e Papës do të ndikojë pozitivisht në qeverinë tonë. Vizita është një akt motivimi për ne, të rinjtë, sepse ne kemi nevojë për kornizën për të ardhmen tonë, por pa paqe nuk do të jetë e mundur.

Fjalimi i Françeskut drejtuar turmës erdhi në ditën e fundit të vizitës së tij emocionale tre-ditore në kombin sub-Saharian prej 105 milionë banorësh, gjysma e të cilëve janë katolikë romakë. Ishte hera e parë në 37 vjet që një papë viziton Kongon. Ai udhëtoi në Sudanin Jugor fqinj të premten. Turma përbëhej kryesisht nga të rinj, shumë prej të cilëve valëvitnin flamurin kongolez me ngjyrë blu.

Gjatë fjalimit të tij, Papa Françesku u shpreh:

Kujdes nga tundimi për t’i drejtuar me gisht dikujt, për të përjashtuar një person tjetër sepse ai ose ajo është i ndryshëm. Kini kujdes nga rajonalizmi, tribalizmi ose çdo gjë që ju bën të ndiheni të sigurt në grupin tuaj. Ju e dini se çfarë ndodh. Së pari, ju besoni në paragjykimet për të tjerët, më pas ju justifikoni urrejtjen, pastaj dhunën dhe në fund e gjeni veten në mes të një lufte.

Ndërsa Hugue-Mangala-Bongonza, një 32 vjeçar i diplomuar për shkenca mjedisore, tha se ky ishte veçanërisht rasti në Kongon lindore, ku konflikti është ndezur midis qeverisë, rebelëve dhe pushtuesve të huaj, i nxitur pjesërisht nga lufta për kontrollin e depozitave të diamanteve, arit dhe metaleve të tjera të çmuara. Përhapja dhe pasojat e gjata nga gjenocidi fqinj i Ruandës në vitin 1994 kanë nxitur gjithashtu dhunën. Pak më herët, Françesku ishte caktuar të vizitonte qytetin lindor të Gomës, por ai u detyrua të anulonte planet e tij për shkak të rritjes së dhunës në zonë.