Skandali përfshiu së fundmi spektaklin e bukurisë “Miss Universe Indonesia”, ku disa nga konkurrentet kanë kallëzuar në polici organizatorët e këtij eventi për ngacmim seksual. Në kallëzim shkruhet se organizatorët iu kanë kërkuar vajzave të zhvishen totalisht, dy ditë para finales, për të kontrolluar nëse i ishin nënshtruar ndonjë operacioni plastik për zmadhimin e gjoksit apo kishin celulit dhe tatuazhe.

Ndërkaq, Organizata Miss Universe ka ndërprerë lidhjet me ekskluzivitetin e saj indonezian pas këtyre akuzave. Organizata me bazë në SHBA tha se ekskluziviteti nuk kishte përmbushur standardet, etikën ose pritshmëritë e markës së saj, ndërkohë që Policia e Xhakartës po heton pretendimet. MUO tha gjithashtu se po anulonte konkursin e këtij viti në Malajzi, i cili drejtohet nga e njëjta kompani, PT Capella Swastika Karya. Organizata Miss Universe falënderoi gratë që paraqitën ankesat për guximin e tyre.

Miss Universe, e cila tani është në edicionin e saj të 73-të, është e njohur në Azinë Juglindore, veçanërisht në Indonezi, Filipine dhe Tajlandë, ku fituesit bëhen të famshëm dhe influencues të mediave sociale. Pronarja e saj Anne Jakrajutatip, një grua transgjinore dhe manjati mediatik tajlandez, ka kërkuar të rinovojë markën për ta bërë atë më gjithëpërfshirëse duke lejuar gratë e martuara, gratë transgjinore dhe nënat beqare të konkurrojnë. Fabienne Nicole Groeneveld e Indonezisë, e cila fitoi konkursin për të përfaqësuar vendin e saj në finalet e Miss Universe 2023 në nëntor, do të konkurrojë me mbështetjen e organizatës, tha MUO.