Fatkeqësisht ka ndërruar jetë në moshën 50-vjeçare reperi Magoo, i cili ishte bërë i njohur si pjesë e dyshes hip-hop Timbaland & Magoo. Lajmi për vdekjen e reperit u konfirmua nga artisti R&B, Digital Black (Benjamin Bush) i “Dru Hill” në një postim në Instagram. Shkaku i vdekjes së artistit ende nuk dihet. Disa nga këngët më të njohura të Magoo emri i vërtetë i të cilit është, Melvin Magoo Barcliff ishin “Up Jumps Da’ Boogie”, “We at it Again” dhe “Party People”.

Reperi e filloi karrierën e tij muzikore në vitin 1989 kur u takua me Timbaland. Magoo dhe Timbaland ishin pjesë e një grupi të quajtur SBI (Surrounded By Idiots) që përfshinte Larry Live dhe këngëtarin Pharrell Williams. Dyshja dolën me albumin e tyre debutues, “Welcome to Our World”, në 1997, i cili shfaqi këngën e tyre hit “Up Jumps Da Boogie”. Timbaland dhe Magoo shpesh bashkëpunuan me anëtarët e tjerë të Swing Mob, duke përfshirë Missy Elliott, Ginuwine, Playa dhe Aaliyah, gjatë karrierës së tyre. Vdekja e Magoo përkoi me 50 vjetorin e hip-hop që u shënua këtë fundjavë.