Donald Trump ka konfirmuar se nuk do të marrë pjesë në debatet presidenciale republikane me rivalët e tij në garën për Shtëpinë e Bardhë. Sipas mediave të huaja, ish-presidenti tha se një sondazh i fundit tregoi se ai kishte numra “legjendarë” përpara kandidatëve të tjerë për të qenë kandidati i partisë për zgjedhjet e vitit 2024.

“Publiku e di se kush jam dhe çfarë presidence të suksesshme kam pasur”, shkroi Trump, 77 vjeç në një postim në rrjetet sociale. Debati i parë presidencial republikan do të mbahet më 23 gusht ndërsa votimi në zgjedhjet paraprake republikane fillon në shtetin e Iowa-s më 15 janar 2024. Sondazhet e fundit kanë treguar vazhdimisht se Trump, i cili përballet me një sërë akuzash penale, është aktualisht kryesuesi për nominimin republikan. Trump kishte sugjeruar vazhdimisht se ai nuk do t’i bashkohej debateve republikane.

Ai kishte përmendur sondazhet që e tregonin atë duke udhëhequr kandidatët e tjerë me “numra në dukje të pakapërcyeshme” dhe ishte ankuar se moderatorët dhe vendet e propozuara mund të ishin “armiqësorë” ndaj tij. Kandidatët e tjerë republikanë për president deri më tani nuk kanë komentuar mbi zhvillimet e fundit.

Ekipi i Trump nuk u përgjigj në pyetjet e bëra nga agjencia e lajmeve Reuters se a planifikonte Trump të merrte pjesë në ndonjë nga debatet republikane në të ardhmen. New York Times raportoi se ish-presidenti ka realizuar një intervistë me ish-prezantuesin e Fox News, Tucker Carlson, që pritet të publikohet në internet më 23 gusht.

Mungesa e Trump në debatin e kësaj jave mund të bëjë që DeSantis të bëhet cak i sulmeve nga kandidatët e tjerë që kërkojnë të shihen si alternativa kryesore ndaj ish-presidentit Trump. Fituesi nga radhët e Partisë Republikane do të përballet me presidentin demokrat, Joe Biden, në zgjedhjet e nëntorit të vitit 2024. Në sondazhin më të fundit të realizuar këtë muaj nga Reuters/Ipsos, Trump kishte 47 % të votave të republikanëve në nivel kombëtar, me DeSantis që pësoi një rënie nga muaji paraprak dhe tani kishte 13 % të votave. Ndërkohë, Trump ka afat deri më 25 gusht për t’u dorëzuar vullnetarisht, pasi javën e kaluar iu ngrit një padi e katërt penale.