Fituesja e çmimit Oscar, Michelle Yeoh, u propozua të premten për të qenë anëtare e Komitetit Olimpik Ndërkombëtar. Yeoh, e cila fitoi çmimin Oscar për aktoren më të mirë këtë vit për interpretimin e saj në “Everything Everywhere All at Once”, ishte mes tetë anëtarëve të rinj potencialë që ka të ngjarë të miratohen nga kolegët e tyre të ardhshëm në një takim muajin e ardhshëm në Mumbai, Indi.

Komitetit Olimpik Ndërkombëtar aktualisht ka 99 anëtarë të ftuar, duke përfshirë një përzgjedhje të anëtarëve të familjes mbretërore, zyrtarë sportivë, ish-atletë dhe liderë nga politika dhe industria. Roli i tyre kryesor në lëvizjen olimpike është konfirmimi i mikëpritësve për Lojërat Verore dhe Dimërore, të cilat janë përzgjedhur paraprakisht nga administrata dhe bordi ekzekutiv.

Michelle Yeoh in Master Z: The Ipman Legacy. Photo: RAM Entertainment

Yeoh gjithashtu ka lidhje me Kombet e Bashkuara, duke përfaqësuar dy herë vendin e saj Malajzinë në Asamblenë e Përgjithshme të saj dhe si ambasadore për programin e zhvillimit të OKB-së. Lidhja e saj më e fortë me sportin është nëpërmjet bashkëshortit të saj, Jean Todt, ish-shefi i ekipit të Ferrarit në garat e Formula 1 dhe ish-president i organit drejtues të sportit motorik i njohur me akronimin francez FIA.

Gjithashtu të premten për anëtarësim u propozuan edhe Cecilia Tait, një ish-ligjvënëse nga Peruja që fitoi medaljen e argjendtë në volejboll dhe Yael Arad, një biznesmene izraelite dhe komentatore sportive që fitoi medaljen e argjendtë në xhudo. Arad ishte fituesja e parë olimpike e Izraelit kur ajo përfundoi e dyta në Lojërat e Barcelonës 1992. Dy zyrtarë sportivë të propozuar, Balázs Fürjes i Hungarisë dhe Michael Mronz i Gjermanisë, janë përfshirë në përgatitjen e ofertave për organizimin e Lojërave Olimpike. Fürjes është një drejtues i lartë sportiv për një kohë të gjatë në qeverinë e kryeministrit hungarez Viktor Orbán.

Dy presidentë të zgjedhur së fundmi të organeve qeverisëse në sportet olimpike do të bëhen gjithashtu anëtarë: Petra Sörling e Suedisë nga pingpong dhe Kim Jae-youl e Koresë së Jugut nga Unioni Ndërkombëtar i Patinazhit. Gjithashtu u propozua udhëheqësi olimpik tunizian Mehrez Boussayene.