Një fitore e Ukrainës kundër Rusisë varet nga bashkëpunimi me Bashkimin Evropian, u tha Volodymyr Zelensky ministrave të jashtëm të BE-së të mbledhur në Kiev.

Kievi shpreson të përmbushë një sërë kriteresh të BE-së për t’u bashkuar me bllokun dhe është mbështetur shumë në ndihmën ushtarake perëndimore që nga fillimi i pushtimit në shkurt të vitit të kaluar.

“Jam i sigurt se Ukraina dhe e gjithë bota e lirë janë në gjendje të fitojnë këtë konfrontim. Por fitorja jonë varet drejtpërdrejt nga bashkëpunimi ynë me ju”– u tha Zelensky ministrave.

“Është shumë e rëndësishme për ne të gjithë të bëjmë hapa përpara në çdo fushë, pa u ndalur në asgjë, duke shtuar aktivitet në Evropë, duke shtuar lidershipin në Evropë.

Është gjithashtu shumë e rëndësishme që të maksimizohet përforcimi i mburojës qiellore të Ukrainës në prag të dimrit. Sistemet e mbrojtjes ajrore që mori vendi ynë, si Patriot, IRIS-T, NASAMS dhe të tjerë, tashmë janë duke luajtur një rol pozitiv në shpëtimin e jetëve.

Ne kemi nevojë për shumë nga këto sisteme – në veçanti, disa Patriotë për mbrojtjen e rajoneve tona jugore mund të ndryshojnë rrënjësisht situatën dhe në një masë të madhe ta bëjnë terrorin rus të pakuptimtë”– tha Zelensky.