Teksa konflikti i rëndë Izrael-Palestinë vijon, protestues të grupit të Solidaritetit me Palestinën në disa qytete britanike brohorisnin sot “Palestina e lirë” në demonstratat kundër sulmeve ajrore në Gaza.

E përditshmja TheMirror shkruan se protestuesit gjithashtu thërrisnin “Rishi Sunak, turp të të vijë” si dhe “Palestinezë të të gjitha gjeneratave po vriten”, teksa tregonin mbështetjen e tyre për territoret e rrethuara nga ushtria.

Zhvillimi vjen teksa qeveria e Londrës ka njoftuar dërgimin e luftanijeve në Mesdhe në mbështetje të qeverisë së Izraelit.

Në disa prej protestave u lëshuan fishekzjarrë teksa disa përleshje të vogla shpërthyen në mitingun në qendër të Londrës, ndërsa marshimet e tjera në Edinburgh, Manchester e Liverpool ishin kryesisht paqësore por me pjesëmarrje të gjerë.

Vetëm në qendrën veriore të Manchester më shumë se 2,000 njerëz u mblodhën për të treguar mbështetjen për Gazan.