Prodhimi global i verës këtë vit ra në nivelin më të ulët që nga viti 1961 pasi vreshtat u goditën nga moti ekstrem. Kjo është bërë e ditur nga Organizata Ndërkombëtare për Hardhinë dhe Verën. Prodhimi arriti në 244.1 milionë hektolitra, që është 7% më pak se në vitin 2022.

“Edhe një herë, kushtet ekstreme klimatike, si ngricat e hershme, shirat e dendur dhe thatësira, ndikuan ndjeshëm në prodhimin e vreshtave në botë”,-tha organizata që ofron të dhëna për vendet që prodhojnë dhe konsumojnë rrush dhe verë. Një numër i prodhuesve kryesorë në hemisferën jugore pësuan rënie të konsiderueshme të prodhimit. Australia, Argjentina, Kili, Afrika e Jugut dhe Brazili panë një rënie të prodhimit midis 10 dhe 30%.

Italia humbi titullin e prodhuesit më të madh në botë pasi prodhimi i saj ra me 12%, duke i lejuar Francës të rimarrë vendin e parë. Spanja ruajti pozicionin e saj si prodhuesi i tretë më i madh i verës në botë, megjithëse prodhimi i saj ra me 14 dhe 19% krahasuar me mesataren pesëvjeçare. Ndërkaq, qeveria franceze do të shpenzojë 200 milionë euro për të shkatërruar verërat e tepërta dhe për të mbështetur prodhuesit.

Vendimi vjen mes një sërë problemesh për industrinë, duke përfshirë një kërkesë në rënie për verë pasi më shumë njerëz pinë birrë artizanale. Mbiprodhimi dhe kriza e kostos së jetesës po godasin gjithashtu industrinë. Në një përpjekje për të reduktuar mbiprodhimin, paratë do të jenë gjithashtu në dispozicion për vreshtarët për të kultivuar produkte të tjera, si ullinjtë.

Qeveria franceze synon të ndalojë kolapsin e çmimeve në mënyrë që prodhuesit e verës të mund të gjejnë përsëri burime të ardhurash. Nëse vera e kuqe ka ndonjë përfitim të dukshëm shëndetësor është ende një çështje e diskutueshme. Megjithatë, studimet kanë treguar se konsumimi i një sasie të moderuar të verës së kuqe, e cila ka një përmbajtje alkooli prej 12%-15% në baza ditore, ndihmon në parandalimin e një sërë sëmundjesh, përfshirë sëmundjet e zemrës.