Një studim i fundit ka dalë në përfundimin se gratë që flenë më pak se shtatë orë natën rrezikojnë një diagnozë të diabetit të tipit 2. Efektet ishin më të forta te gratë që kishin kaluar në menopauzë. Shkencëtarët amerikanë zbuluan se humbja e vetëm 90 minutave gjumë çdo natë dhe për rrjedhojë mosmbyllja e mjaftueshme e syve, te gratë rrit rezistencën ndaj insulinës.

Gjatë jetëgjatësisë së tyre, gratë përballen me shumë ndryshime në shprehitë e tyre të gjumit për shkak të lindjes së fëmijëve, rritjes së tyre dhe menopauzës. “Për një periudhë më të gjatë kohore, stresi i vazhdueshëm në qelizat që prodhojnë insulinë mund të shkaktojë dështimin e tyre, duke çuar përfundimisht në diabetin e tipit 2”- është shprehur autorja kryesore e studimit, profesoresha Marie-Pierre St-Onge.

Gjetjet janë të parat që tregojnë se një deficit i lehtë i gjumit për vetëm gjashtë javë, shkakton ndryshime në trup që rrisin rrezikun e zhvillimit të kësaj sëmundjeje. Diabeti ndodh kur trupi nuk e përdor siç duhet insulinën ose nuk e prodhon atë, duke e lënë glukozën të rritet në gjak në nivele të rrezikshme. Mund të jetë vdekjeprurëse ose të shkaktojë dëmtim të organeve nëse nuk trajtohet. Shumë njerëz kanë diabet të tipit 2 për vite pa e kuptuar, sepse simptomat e hershme priren të jenë të përgjithshme ose nuk ka simptoma.

Studimet e mëparshme zbuluan se periudha të shkurtra të privimit total të gjumit mund ta dëmtojnë aftësinë e trupit për të shpërbërë sheqerin. Studiuesit analizuan 38 gra të shëndetshme, duke përfshirë 11 gra pas menopauzës, të cilat në mënyrë rutinore flinin të paktën shtatë orë e gjysmë çdo natë. Më pas pjesëmarrëseve iu kërkua ta shkurtonin gjumin e natës në rreth gjashtë orë për gjashtë javë, duke e shtyrë kohën e fjetjes për 90 minuta, por duke e mbajtur të njëjtën kohë të zgjimit.

Gratë u monitoruan me pajisje të vendosura dhe studiuesit matën insulinën, glukozën dhe yndyrën e tyre trupore. Studimi zbuloi se shkurtimi i gjumit rriti nivelet e insulinës me mbi 12% në përgjithësi dhe me më shumë se 15% në mesin e grave para menopauzës. Rezistenca ndaj insulinës u rrit me gati 15% në përgjithësi dhe me më shumë se 20% në mesin e grave pas menopauzës.

“Fakti që ne pamë këto rezultate pavarësisht nga çdo ndryshim në yndyrën e trupit, i cili është një faktor i njohur rreziku për diabetin e tipit 2, flet për ndikimin e reduktimit të lehtë të gjumit në qelizat që prodhojnë insulinë dhe metabolizmin”, ka shtuar Dr Marie-Pierre. Një ulje prej vetëm 1% e sasisë së gjumit të thellë në pleqëri lidhet me një rritje prej 27% të rrezikut të zhvillimit të demencës. Një studim i ri konfirmon ekzistencën e një lidhjeje midis gjumit dhe shëndetit të trurit.