Trupat ruse kanë shënjestruar objektet e infrastrukturës në rajonet jugore të Ukrainës, Dnipropetrovsk e Herson, duke shkaktuar dëme të konsiderueshme. Kjo po ndodh në kohën kur Ukraina po përgatitet për një rritje të sulmeve ndaj objekteve të saj energjitike gjatë dimrit të ardhshëm.

Qytetet Krivi Rih e Nikopol, si dhe rrethinat e tyre, u goditën gjatë natës, por nuk kishte viktima.

Rreth mesnatës kishte një shpërthim në lagjen Krivorizka. Armiku e drejtoi raketën për në objektivin e infrastrukturës. Kaloi pa asnjë të vdekur apo të plagosur. Agresori sulmoi lagjen Çervonohrihorivka, në periferi të rajonit Nikopol, me artileri të rëndë. Asnjë njeri nuk u lëndua.

Në Herson, një civil u plagos nga bombardimet ruse, siç njoftoi shefi i administratës ushtarake të qytetit, Roman Mrochko.

Rreth orës 01:00, ushtria ruse bombardoi lagjet e banimit të Hersonit nga bregu i majtë i pushtuar përkohësisht. Një person rreth 45-vjeç u plagos pas një sulmi të armikut dhe atij iu dha ndihma mjekësore.

Rusia ka bombarduar vazhdimisht Hersonin përmes lumit Dnjepër, pasi u tërhoq në bregun e majtë një vit më parë, ndërsa forcat ukrainase çliruan qytetin. Një ditë më parë, një 42-vjeçar u vra nga sulmet ruse në qendër të Hersonit.

Në rajonet lindore të Harkivit dhe Donjeckut, forcat ukrainase zhvilluan 74 beteja të afërta gjatë 24 orëve të fundit, siç njoftoi Shtabi i Përgjithshëm i ushtrisë ukrainase në raportin ditor të 23 nëntorit. Në Harkiv, trupat ukrainase zmbrapsën 12 sulme ruse në Sinkivka, Petropavlivka e Ivanivka, si dhe rreth këtyre vendeve.

Në Donjeck, forcat ukrainase vazhduan ofensivën e tyre në Bahmut, qytet që ra në duart e trupave ruse në fillim të këtij viti pas një beteje të përgjakshme mujore. Ushtria u shpreh se forcat ruse lëshuan pa sukses 42 dronë kamikazë kundër pozicioneve ukrainase.

Në pikën tjetër të Donjeckut, në Avdijivka, forcat ruse vazhduan të ushtrojnë presion në përpjekjet e tyre të pasuksesshme për të rrethuar qytetin industrial që po mbrohet nga forcat ukrainase.

Raportet nuk mund të verifikoheshin menjëherë në mënyrë të pavarur.