Sot është Dita Ndërkombëtare e Maleve. Sipas statistikave më të fundit të bëra publike nga Organizata e Kombeve të Bashkuara, OKB, malet janë shtëpia e 15% të popullsisë së botës dhe strehojnë rreth gjysmën e pikave të nxehta të biodiversitetit në nivel global. Ato sigurojnë ujë të ëmbël për jetën e përditshme për gjysmën e njerëzimit, duke ndihmuar në ruajtjen e agrokulturës e të furnizimit me energji të pastër dhe ilaçe.

Për fat të keq, malet janë nën kërcënimin e ndryshimeve klimatike, mbishfrytëzimit e kontaminimit, duke rritur rrezikun për njerëzit dhe planetin.

Ndërsa klima globale vazhdon të ngrohet, akullnajat malore shkrihen duke ndikuar në furnizimin me ujë të ëmbël në rrjedhën e poshtme e banorët e maleve, ndër më të varfërit në botë, përballen me beteja edhe më të mëdha për të mbijetuar.

Shpatet e pjerrëta nënkuptojnë se shfarosja e pyjeve për bujqësi, vendbanime ose infrastrukturë mund të shkaktojë erozionin e tokës, si dhe humbjen e habitatit. Erozioni dhe ndotja dëmtojnë cilësinë e ujit e rrjedhimisht edhe produktivitetin e tokës.

Mbi 311 milion banorë të maleve në vendet në zhvillim, jetojnë në zona të ekspozuara ndaj degradimit progresiv të tokës, 178 milion prej të cilëve konsiderohen të pambrojtur ndaj pasigurisë ushqimore.

OKB-ja tërheq vëmendjen se ky problem na prek të gjithëve, prandaj duhet të zvogëlojmë gjurmën tonë të karbonit e po ashtu të kujdesemi për këto thesare natyrore.

Dita Ndërkombëtare e Maleve 2023, nën titullin “Rivendosja e ekosistemeve malore” është një shans për të rritur ndërgjegjësimin për rëndësinë e ekosistemeve malore dhe thirrje për zgjidhje të bazuara në natyrë, praktikat më të mira e investime që ndërtojnë elasticitetin, zvogëlojnë cënueshmërinë dhe rrisin aftësinë e maleve që të përshtaten me kërcënimet e përditshme, si dhe ngjarjet ekstreme klimatike.

Sot në Ditën Ndërkombëtare të Maleve, Presidenti i Republikës, Bajram Begaj theksoi se në këtë ditë, nderojmë thesaret tona natyrore.

Bukuria e tyre e mahnitshme është thirrje e gjithkahershme për rëndësinë e ruajtjes së këtyre peizazheve të mrekullueshme.

Malet janë strukturat më të bukura të natyrës, madhështore, të forta që qëndrojnë përballë qiellit dhe ndjejnë se mund të kapin të gjithë fshatrat në hijen e tyre. Ato janë burimet e rekreacionit dhe burimi i bujqësisë, ofrojnë hapësirë ​​të bollshme në shpatet për prodhim. Turizmi malor tërheq rreth 15-20% të turizmit global.