Një grup kriminal i trafikimit të kanabisit është shkatërruar në Vlorë, pas një operacioni antidrogë të zhvilluar gjatë natës deri në orët e para të mëngjesit.

Sipas burimeve, është sekuestruar rreth 500 kilogramë kanabis dhe janë vënë në pranga shtatë persona. Dy furgona dhe dy automjete janë sekuestruar, gjatë operacionit, ku policisë së Vlorës, iu bashkuan forcat RENEA dhe FNSH.

Nga hetimet e kryera, vepronin në mënyrë të organizuar për ta trafikuar drejte shtetit turk. Kishin përpunuar ambalazhuar lëndën narkotike, dhe më pas në automjetin po e transportin drejt detit me qëllim transportin drejt Turqisë. Në lagjen 11 janari është bllokuar automjeti dhe sekuestroi 34 pako të mbushur me kanabis, tha policia.

Në pranga kanë rënë Idriz Meminaj, Romir Meminaj, Emanuel Meminaj, Nertin Gjoni, Xhuljano Gjoni, Laurent Likaj dhe Altin Meçi.

Ndërkohë, në kërkim janë edhe disa shtetas të tjerë, banues në Vlorë dhe Tiranë, emrat e të cilëve nuk bëhen publikë, për arsye se hetimi është në zhvillim dhe sipër.

Droga mbahej në magazinën e Idriz dhe Romir Meminajt. Pasi ishte paketuar, po transportohej me mjetin e drejtuar nga Nertin Gjoni, që u ndalua në lagjen 11 janari

Gjatë kontrolleve të banesave të autorëve, janë sekuestruar dy armë zjarri, katër automjete dhe 8 celularë, sipas policisë.

Të dyshuarit vepronin në formën e një grupi kriminal, ku secili kishte rolin e tij në paketimin, ambalazhimin dhe transportimin jashtë shtetit të lëndës narkotike.