Përveç sulmeve të sotme në hapësirën kibernetike, Ukraina po përballet edhe me bombardime nga ajri.

Gati 600 predha ruse dhe raketa ranë si shi në një rajon jugor të Ukrainës, në të njëjtën ditë që hakerët e paidentifikuar rrëzuan shërbimet telefonike dhe të internetit të telekomit në vend.

“Një person u vra dhe katër u plagosën gjatë 24 orëve të bombardimeve ruse në rajonin jugor Kherson të Ukrainës”, sipas Oleksandr Prokudin, kreu i administratës ushtarake rajonale.

Numri i predhave të lëshuara në Kherson ishte më i larti për të paktën dy javët e fundit, megjithëse autoritetet lokale kanë thënë se zakonisht lëshohen nga 200 deri në 500 predha kundër rajonit çdo ditë.

Breshëritë me rreze të gjatë veprimi kanë qenë karakteristikë e luftës 21 mujore. Ndërsa dimri fillon dhe pengon lëvizjet e trupave nga të dyja anët, artileria, raketat dhe dronët po luajnë një rol në rritje.

Ndërkaq, Presidenti ukrainas Volodymyr Zelensky mbërrin sot (12 Dhjetor) për bisedime në Uashington në një moment kritik, pasi Shtëpia e Bardhë paralajmëron se ndihma amerikane për Ukrainën mund të mbarojë së shpejti.

Ftesa e orës së njëmbëdhjetë nga Presidenti Joe Biden nënvizon urgjencën në miratimin e paketës së re, me vlerë dhjetëra miliarda dollarë, siç paralajmërojnë ai dhe zyrtarë të tjerë të administratës ndihma amerikane e miratuar tashmë do të shterohet deri në fund të vitit, raporton CNN.

Biden ka kërkuar rreth 60 miliardë dollarë ndihmë të re për Ukrainën, pjesë e një pakete më të madhe financimi emergjente që përfshin gjithashtu ndihmë për Izraelin dhe fonde për sigurinë kufitare.