Prokurime publike me Inteligjencë Artificiale, qeveria miraton projektligjin. Ministrja e Infrastrukturës, njëherësh zëvendëskryeministrja Belinda Balluku, tha se ky projektligj synon përmirësimin e kuadrit rregullator të prokurimit në Shqipëri, duke adresuar kështu të gjitha gjetjet që kanë dalë gjatë procesit të screen-ing në Bruksel.

“Do të përmend disa nga risitë që sjell ky projektligj, i cili synon digjitalizimin e të gjithë procesit të prokurimeve në Republikën e Shqipërisë, duke marrë parasysh se tashmë qeveria shqiptare ka digjitalizuar pjesën më të madhe të shërbimeve që ne ofrojmë nga institucionet e administratës, por nga ana tjetër edhe përqasja jonë për sa i përket inovacionit dhe digjitalizimit në Shqipëri, do të prekë edhe sektorin e prokurimeve.

Kryerja e vlerësimit automatik të plotësimit të kritereve të përgjithshme dhe të veçanta për kualifikimin e ofertuesve në fazën e parë të kualifikimit si dhe zhvillimin e sistemit dinamik të blerjes dhe ankandit elektronik, duke përdorur teknologji të avancuara digjitale, por edhe inteligjencën artificiale, që prej disa kohësh, kemi nisur të implementojmë të gjitha strukturat ofertuese të shërbimeve”.

Me automatizimin e procedurës, sipas zëvendëskryeministres, ulet ndikimi nga njeriu dhe rritet transparenca.

“Nga ana tjetër, kryerja e disa proceseve të prokurimit publik si përllogaritja e vlerës limit të kontratës, hartimi i specifikimeve teknike e sisteme elektronike të certifikuara, duke ulur kështu sa më shumë ndikimin e faktorit njerëzor në proceset e prokurimeve, duke e automatizuar këtë proces, për të krijuar një transparencë sa më të madhe dhe një akses të plotë të gjithë entiteteve të interesuara”.