Vatikani mund të luajë një rol të rëndësishëm në zgjidhjen e krizës në Gaza. Kështu deklaroi ministri i Jashtëm iranian, Hossein Amir-Abdollahian, gjatë një takimi me Sekretarin e Shtetit të Selisë së Shenjtë, Pietro Parolin, në margjinat e Forumit Global të Refugjatëve në Gjenevë.

Siç raporton agjencia Mehr, ministri iranian përsëriti se ajo që po ndodh në Rrip është një “gjenocid” që “bota nuk mund ta tolerojë më”.

Ai shton se Republika Islamike e konsideron Hamasin “një lëvizje lirie që lufton kundër pushtimit izraelit”, duke specifikuar se Teherani nuk është në favor të zgjerimit të luftës në rajon.

Nga ana e tij, Parolin shprehu shqetësimin për situatën, duke deklaruar se Vatikani mbështet përpjekjet për të garantuar një armëpushim në Gaza. Sekretari i Shtetit nënvizoi gjithashtu angazhimin e Vatikanit për dërgimin e ndihmave humanitare.

Ndërkohë Ministri i Jashtëm i Izraelit, Eli Cohen, tha se pranimi i një armëpushimi në Gaza në këtë fazë do të ishte një gabim dhe se Izraeli do të vazhdojë luftën e tij kundër Hamasit, pavarësisht nëse ka mbështetje ndërkombëtare.

“Izraeli do të vazhdojë luftën kundër Hamasit me ose pa mbështetje ndërkombëtare. Armëpushimi aktual është një dhuratë për organizatën terroriste Hamas dhe do ta lejojë atë të kthehet dhe të kërcënojë banorët e Izraelit”, tha Cohen.

Cohen gjithashtu i bëri thirrje komunitetit ndërkombëtar që të veprojë “në mënyrë efektive dhe agresive” për të mbrojtur korsitë globale të transportit.