Mbrëmja e Vitit të Ri në Rusi është një ngjarje e madhe, e festuar me tradita të pasura kulturore dhe një përzierje unike e zakoneve të vjetra dhe të reja që krijojnë një pamje të paharrueshme. Benjamin M. Compaine në librin e tij “Festat dhe Traditat Ruse” zbërthen traditat e festimit të Vitit të Ri në Rusi.

Entuziazmi për Vitin e Ri fillon disa javë para datës 31 Dhjetor ku familjet zbukurojnë shtëpitë e tyre me drita dhe zbukurime shumëngjyrëshe, si dhe me pemën tradicionale. Ekuivalenti rus i Babagjyshit është Ded Moroz (Babai i Ftohtë), shoqëruar nga Snegurochka (Vajza e Dëborës). Këto personazhe sjellin dhurata dhe gëzim për fëmijët, duke vizituar shtëpitë dhe duke lënë dhuratat nën pemën e Vitit të Ri.

Kullat e Kremlinit dhe fjalimi i presidentit

Kur akrepat shënojnë 12, kullat e njohura të Kremlinit fillojnë të kumbojnë në Moskë. Më pas vjen fjalimi i Presidentit për Vitin e Ri, i transmetuar në të gjithë vendin, duke ndarë reflektime për vitin që ka kaluar dhe shpresat për vitin e ardhshëm.

Darka dhe festimet

Darka e mbrëmjes së Vitit të Ri, e njohur si “Novogodniy Stol” (tavolina e Vitit të Ri), është një pasuri e vërtetë e pjatave tradicionale ruse si sallata Olivier apo siç njihet gjërësisht në Shqipëri me emrin sallata ruse. Familjet mblidhen rreth tryezës dhe ndajnë me njëri tjetrin urimet për vitin që vjen. Qielli ndizet me shfaqje të mrekullueshme të zjarreve artificiale nëpër qytete dhe fshatra. Njerëzit dalin në rrugë për t’u bashkuar në festimet publike dhe duke u argëtuar me muzikë, kërcime dhe frymëzim festiv që mbush ajrin.