Këshilli i Sigurimit i Kombeve të Bashkuara më në fund ka rënë dakord për një rezolutë për të marrë më shumë ndihmë në Gaza, pas ditësh negociatash të tensionuara diplomatike.

Për të marrë atë ndihmë sa më shpejt të jetë e mundur, rezoluta kërkon gjithashtu krijimin e kushteve për një ndërprerje të qëndrueshme të armiqësive, por nuk kërkon armëpushim.

Sipas BBC rezoluta kërkon që të gjitha palët të lehtësojnë përdorimin e rrugëve nëpër Rripin e Gazës, duke përfshirë pikat kufitare, për ofrimin e ndihmës humanitare.

Ai përmendi gjithashtu krijimin e një roli koordinator humanitar të OKB-së për të mbikëqyrur ndihmën në Gaza. Izraeli do të vazhdojë të jetë i përfshirë në këtë proces.

Pas votimit, shefi i OKB-së Antonio Guterres tha se problemi i vërtetë për përpjekjet e OKB-së për ndihmë ka qenë ofensiva e Izraelit, për të cilën ai thotë se ka krijuar pengesa masive.

Shefi i OKB-së, António Guterres, ia hodhi fajin Izraelit për mungesën e një rruge të sigurt për të dërguar ndihma në Gaza.

Sipas tij problemi i vërtetë, për dërgimin e ndihmave tek palestinezët e prekur nga bombardimet, është ofensiva e Izraelit.

Guterres tha se sulmet po krijojnë pengesa masive për shpërndarjen e ndihmave humanitare brenda Gazës.

“Një armëpushim humanitar është e vetmja mënyrë për të filluar të plotësohen nevojat e dëshpëruara të njerëzve në Gaza dhe t’i japë fund makthit të tyre të vazhdueshëm”, shtoi më tej Guterres.

Sekretari i Përgjithshëm i OKB-së bëri edhe disa vërejtje, kjo pasi në javët e fundit nuk ka pasur “asnjë ndryshim domethënës” në mënyrën se si po zhvillohet lufta në Gaza.

“Nuk ka mbrojtje efektive të civilëve. Bombardimet intensive izraelite dhe operacionet tokësore vazhdojnë, ndërsa Hamasi dhe fraksionet e tjera palestineze vazhdojnë të gjuajnë raketa ndaj Izraelit”, tha ai.

Guterres vazhdon të parashtrojë krizën humanitare në Gaza, duke përfshirë kolapsin e sistemit mjekësor, krizën e përhapur të ushqimit dhe prishjen e rendit publik.