Autoritetet turke arrestuan 304 të dyshuar për lidhje me grupin militant, Shteti Islamik, gjatë një operacioni në 32 provinca. Njoftimin e dha sot ministri i Brendshëm i Turqisë, Ali Yerlikaya. Shumica e të dyshuarve u kapën në tri qytetet më të mëdha të Turqisë, Ankara, Stamboll e Izmir, konfirmoi Yerlikaya në një njoftim në rrjetin social X.

Po ashtu, informoi se aksioni i koduar “Operacioni Heronjtë-34” u mbajt njëkohësisht në gjithë vendin.

Ne nuk do të lejojmë asnjë terrorist të hapë sytë dhe këtë e bëjmë për të siguruar paqe e unitet për popullin tonë. Ne do ta vazhdojmë betejën me përpjekjet e mëdha të forcave tona të sigurisë.

Po ashtu, zyrtari i lartë turk publikoi pamje ku shihej policia duke hyrë në banesa, si dhe duke i shoqëruar të arrestuarit nëpër automjete.

Kujtojmë se Shteti Islamik kishte nën kontroll një të tretën e Irakut e të Sirisë në vitin 2014. Edhe pse i mposhtur, ISIS-i vazhdon që të kryejë sulme të përgjakshme. Ky grup militant ka ndërmarrë atentate të shumta në Turqi, përfshirë në një klub nate më 1 janar të vitit 2017 në Stamboll, ku u vranë 39 njerëz.

Autoritetet turke i kanë intensifikuar operacionet kundër Shtetit Islamik dhe gjithashtu ndaj militantëve kurdë në javët e fundit, pasi pikërisht militantët kurdë shpërthyen një bombë pranë objekteve qeveritare në kryeqytetin Ankara, më 1 tetor.

Turqia ka kryer rregullisht operacione brenda vendit e në veri të Irakut ndaj Punëtorëve të Partisë së Kurdistanit (PPK), të cilët i cilëson si organizatë terroriste.