Lideri i opozitës ruse dhe një kritik presidentit Vladimir Putin, Alexei Navalny ka ndërruar jetë sipas shërbimit të burgut.

 “Më 16 shkurt 2024, në koloninë korrektuese nr. 3, i dënuari AA Navalny nuk u ndje mirë pas një shëtitjeje, pothuajse  humbi vetëdijen. Menjëherë kanë mbërritur punonjësit mjekësorë të institucionit dhe është thirrur ekipi mjekësor i urgjencës. Janë kryer të gjitha masat e nevojshme reanimuese, por nuk kanë dhënë rezultate pozitive. Mjekët e Urgjencës kanë konfirmuar vdekjen e të dënuarit”, thuhet në një deklaratë.

47-vjeçari u dënua me 19 vite burg për ekstremizëm, ndërsa ditët e fundit i kaloi në burgun e Arktikut.

Kush ishte Navalny?

I lindur në një fshat në perëndim të Moskës, Alexei Navalny u bë kritiku më i lartë i kohës së Putinit në pushtet.

Aktivizimi i tij politik, duke përfshirë hetime të gjera për korrupsionin e nivelit të lartë dhe kandidimin për të qenë kryebashkiak i Moskës, i dha atij famë dhe shumë besonin se ai përbënte një kërcënim për zotin Putin.

Ishte gushti i vitit 2020 kur lufta e tij kundër presidentit rus u bë titujt kryesorë botërorë. Ai  u sëmur rëndë gjatë një fluturimi nga Siberia në Moskë  dhe Navalny u dërgua në Berlin.

Ekipi i tij akuzoi Kremlinin për helmimin e tij, një akuzë që Kremlini e mohoi. Mjekët gjermanë konfirmuan se ai ishte helmuar me novichok, një agjent nervor i kohës sovjetike.

Pavarësisht rrezikut, Navalny zgjodhi të kthehej në Rusi, ku më vonë u arrestua, u dënua me akuza që ai thotë se janë të motivuara politikisht dhe mbeti në burgjet ruse deri në vdekjen e tij të raportuar sot.