Një gjykatë në Bangladesh ka ndaluar adoptimin e elefantëve të egër, një veprim i përshëndetur nga aktivistët e të drejtave të kafshëve. Grupet e të drejtave thanë se urdhri i gjykatës së lartë për pezullimin e licencave do të ndalojë torturimin e elefantëve aziatikë të robëruar në emër të trajnimit.

“Gjykata e Lartë pezulloi të gjitha licencat për rritjen e elefantëve në robëri”,-tha për AFP Amit Das Gupta, zëvendësprokuror i përgjithshëm i vendit. Sipas Unionit Ndërkombëtar për Ruajtjen e Natyrës, ka rreth 100 elefantë aziatikë të mbyllur në Bangladesh dhe dy herë më shumë në natyrë.

Bangladeshi dikur ishte një nga shtëpitë kryesore të elefantëve aziatikë, por popullsia e tyre është zvogëluar për shkak të gjuetisë pa leje dhe shkatërrimit të habitatit. Zëvendësavokati i shtetit tha se elefantët u shfrytëzuan dhe u përdorën për zhvatje fondesh në rrugë, në kundërshtim me kushtet e licencimit.

Aktivistët e të drejtave të kafshëve shpresojnë se vendimi i Gjykatës së Lartë do t’i japë fund trajnimit shpesh brutal të elefantëve. Ndërkaq, ju shuajmë një kuriozitet. Qeveria e Sri Lankës në vitin 1981 i dhuroi zonjës së parë të Filipineve, Imelda Marcos, një elefant të vogël femër. Mali, i cili në atë kohë ishte 11 muajsh, u dërgua në kopshtin zoologjik të Manilës, ku qëndroi së bashku me një elefant tjetër, që vdiq në vitin 1990.

Që atëherë, Mali mbeti e vetme në kopshtin zoologjik. Ajo kaloi gati 30 vite në vetmi, brenda hapësirës së saj prej betoni, gjë që kishte shkaktuar shqetësim dhe reagime nga shumë organizata dhe aktivistë për mbrojtjen e kafshëve. Edhe Sir Paul Mccartney u kishte sugjeruar autoriteteve ta transferonin atë në një vend të shenjtë për elefantët. Më në fund, elefanti femër i konsideruar “më i trishtuari” në botë ngordhi në kopshtin zoologjik të Filipineve më 29 nëntor.