Aktualisht vetëm 1.53% e Japonisë e ka këtë mbiemër, por me rritjen e popullaritetit të tij dhe falë ligjeve specifike të vendit, deri në vitin 2531 mbiemri i famshëm do të mbizotërojë, thonë ekspertët vendas.

Japonia është nga vendet e pakta në botë që kërkon me ligj që dy bashkëshortët të kenë të njëjtin mbiemër, sipas kodit civil që daton prej vitit 1898. Disa sfida ligjore nuk kanë arritur ta ndryshojnë rregullin, teksa liberalët thonë se kjo “pengon gratë që kanë krijuar karrierën e tyre me mbiemrin e vajzërisë”.

Mbiemri ‘Sato’ është i përhapur në Japoni si të ishte për shembull ‘Smith’ në Britani, thotë studiuesi demografik Yoshida, teksa shton më tej: “Nëse të gjithë marrin mbiemrin Sato, njerëzit do të duhet të dallohen nga emri i tyre i parë ose të vënë numra. Historia familjare është gjithashtu një simbol kulturor në vend.”

Disa Sato të famshëm në vend përfshijnë ish-kryeministrin Eisaku Sato, që ka shërbyer në vitet 1964-72, mundësi Jackie Sato, aktori Koichi Sato, sportisti Takuma Sato dhe aktorja amerikane Reiko Sato.

Mbiemri Sato mbahet aktualisht nga 1.53% e popullatës vendase, por sipas llogaritjeve të Yoshida, kjo masë rritet çdo vit me 1.0083%.

Kështu që nëse kjo tendencë vazhdon, më shumë se gjysma e japonezëve do të kenë këtë mbiemër deri në vitin 2446. Ndërsa mbiemra të tjera të përhapur si Suzuki, Takahashi e Tanakas, pritet të zhduken deri në vitin 2531.

Japonia llogaritet se ka rreth 130,000 mbiemra por rreth 50,000 mbahen nga më pak se pesë familje, shkruan profesori, sipas rrjetit britanik DailyStar.