Presidenti francez Emmanuel Macron tha të dielën se vendi i tij është “i gatshëm të kontribuojë më shumë në mbrojtjen e Evropës”.

Në një intervistë të botuar në disa gazeta franceze, Macron tha se armët bërthamore të Francës mund të jenë pjesë e një strategjie të përbashkët evropiane të mbrojtjes.

Është hera e dytë në ditët e fundit ku Macron shpreh gatishmërinë e Francës për t’u përfshirë më shumë. Të enjten, Macron bëri thirrje për një strategji “të besueshme” të mbrojtjes evropiane.

Çfarë tha Macron për armët bërthamore?

Doktrina e Francës ka qenë përdorimi i armëve bërthamore vetëm kur kërcënohen interesat jetike të vendit. Por Macron tha se ishte i hapur për t’u dhënë një “dimension më evropian” këtyre interesave.

“Unë jam gati të hap këtë debat, i cili duhet të përfshijë mbrojtjen kundër raketave, armë me rreze të gjatë dhe armët bërthamore për ata që i kanë ato ose që mbajnë armatim bërthamor amerikan”, tha ai.

“Le t’i vendosim të gjitha në tryezë dhe të shohim se çfarë na mbron vërtet”, shtoi ai.

Parisi do të “ruajë specifikën e tij, por është i gatshëm të kontribuojë më shumë në mbrojtjen e Evropës”.

Si reaguan politikanët francezë?

Vërejtjet e Macron tërhoqën kritika nga kundërshtarët e tij përpara zgjedhjeve të ardhshme të BE-së në qershor.

Ligjvënësi evropian Francois-Xavier Bellamy, i cili do të udhëheqë partinë e krahut të djathtë LR në votimin në BE, i përshkroi komentet si “jashtëzakonisht serioze”.

“Ne po prekim nervin e sovranitetit francez,” tha ai në një intervistë për stacionin radiofonik Europe 1.
Ligjvënësi francez i ekstremit të majtë Bastien Lachaud tha se parandalimi bërthamor i Francës “nuk mund të ndahet me të tjerët”.

“Nën maskën e mbrojtjes së tokës evropiane, Macron dëshiron të likuidojë autonominë strategjike të Francës”, tha Lachaud.

Ligjvënësi evropian i ekstremit të djathtë, Thierry Mariani, i cili është anëtar i Rassemblement National (RN) të Marine Le Pen, akuzoi Macronin se “po kthehet në një rrezik kombëtar”.