Rusia u shpreh se nuk ka ndonjë kuptim që të marrë pjesë në konferencën në Zvicër për të diskutuar se si mund t’i jepet fund konfliktit në Ukrainë.  Zvicra pritet që të organizojë bisedime në datat 15-16 qershor me kërkesë të presidentit ukrainas Volodymyr Zelenskyy. Ministri i Jashtëm zviceran, Ignazio Cassis deklaroi se mbi 100 vende do të marrin ftesë për atë takim. Gazetarëve në kryeqytetin Bernë, Cassis iu tha:

Vendi i parë me të cilin folëm, sigurisht pas Ukrainës ishte Rusia, pasi një proces paqeje nuk mund të ndodhë pa Rusinë edhe nëse nuk do të jetë e pranishme për takimin e parë.

Ndërkaq, ministri i Jashtëm ukrainas, Dmytro Kuleba gjatë një interviste të publikuar në revistën “Foreign Policy” u shpreh:

E dimë se nuk ka kuptim të jetë Rusia në tryezë nëse nuk mund të sigurohemi se do të veprojnë në mirëbesim.

Kuleba vuri në dukje se rritja e presionit ndaj Rusisë në fushëbetejë dhe bashkimi i vendeve që kanë parime të njëjta do të ndihmojnë për ta bërë Moskën më të gatshme që të angazhohet në dialog. Nga ana tjetër, në fjalën e tij të një nate më parë, presidenti i Ukrainës, Volodymyr Zelensky tha:

Konferenca në fjalë, praktikisht është shansi i parë i vërtetë për të filluar rikthimin e një paqeje të drejtë.

Qeveria zvicerane konfirmoi se “aktualisht, Rusia nuk është ndër pjesëmarrësit në konferencë”. Më tej vuri në dukje se është e hapur për një përfshirje të shtetit rus, por në mënyrë të përsëritur, Moska ka thënë se nuk është e interesuar.

Sulmet vazhdojnë

Rusia e sulmoi Ukrainën dy herë dje. Raketat ruse goditën dhe plagosën të paktën 9 persona, mes tyre 8 fëmijë në rajonin verilindor Kharkiv, siç njoftuan zyrtarët ukrainas. Ata shtuan se në një tjetër sulm, raketat ruse plagosën 14 persona në një zyrë postare në qytetin jugor Odesa. Rusia ka mohuar se vendos në objektiv civilët gjatë sulmit në Ukrainë, por vazhdimisht ka goditur qytetet ukrainase me dronë dhe raketa gjatë gati dy viteve.

Zyrtarët rusë thanë se dje pati sulme me dronë ukrainas ndaj disa rajoneve. Gjithashtu, Rusia refuzoi akuzat amerikane se ka përdorur agjentë kimikë të ndaluar në Ukrainë. Zëdhënësi i Kremlinit, Dmitry Peskov i quajti akuzat “të pabaza”.

Dy ditë më parë, Shtetet e Bashkuara akuzuan Rusinë për shkelje të traktatit ndërkombëtar për ndalimin e agjentëve kimikë, duke përdorur kundër forcave ukrainase agjentin kloropicrin.