Pas shortit të Euro 2024, kreu i FSHF-së Duka: Kualifikimi, objektiv real!
Pasi në shortin e hedhur në Frankfurt të Gjermanisë, sot Shqipëria njohu rivalët në eliminatoret e EURO 2024, Armando Duka theksoi se “kualifikimi është objektiv real”. Duke folur në SuperSport, presidenti i Federatës Shqiptare të Futbollit tha se skuadra duhet ta tregojë veten në fushë, se në të kundërt, duke menduar se është një grup i lehtë, “mund të bëjmë më keq”.
I pyetur se çfarë mendon për shortin, Duka i shfaqur me trajnerin e kuqezinjve Edy Reja, deklaroi:
Të gjitha skuadrat janë të mira, i pranueshëm. Grupi B dhe C ishin të vështirë, në grupin tonë mund të luhen ndeshjet dhe mund të bësh çdo rezultat. Eshtë real objektivi për të qenë pjesë e Euro 2024.
Jeni përkrah trajnerit, cila do të jetë e ardhmja e Rejës?
Jemi për shortin dhe më pas do të diskutojmë për vazhdimin, siç e kemi bërë gjithnjë me trajnerin. Do të bisedojmë për më të mirën e Shqipërisë. Nuk mund të mendosh nga shorti që je kualifikuar, por duhet të shohësh fushën. Kur kemi marrë shortin për Euro 2016, menduam se ishte i pakalueshëm, por ia dolëm. Tani nëse mendojmë se është një grup i lehtë, atëherë do të bëjmë më keq se më parë. Janë skuadra të forta, Polonia është pjesëmarrëse në Botëror, edhe Moldavia e Ishujt Faroe janë në rritje.
Kujt i druhesh më shumë?
Moldavia dhe Ishujt Faroe kanë diferencë nga Polonia e Çekia, po të ishin më të forta do të ishte më mirë, pasi objektivi i tyre tashmë do të jetë Shqipëria.
Fitoret 1 milion euro?
Grupi me pesë është më pak impenjativ dhe nuk kam pishman për skuadrën e gjashtë për shkak të përfitimit financiar, dëshiroja të ishim në një grup me pesë.
Nga shorti i hedhur në mesditë në Frankfurt, u mësua se në Grupin E, Shqipëria do të përballet me Poloninë, Republikën Çeke, Ishujt Faroe e Moldavinë.