Kombet e Bashkuara kërkojnë të vazhdojë marrëveshja për eksportin e grurit mes Ukrainës dhe Rusisë, akord i ndërmjetësuar nga vetë OKB-ja, si dhe nga Turqia. Qëllimi është të rifillojë eksporti i drithërave. Sipas OKB-së, kjo është e nevojshme për të kontribuar në sigurinë globale ushqimore. Marrëveshja fillestare ishte caktuar të zgjaste 120 ditë, me opsionin për ripërtëritje më 19 nëntor, nëse asnjë palë nuk kundërshton. Një zëdhënës i Kombeve të Bashkuara deklaroi:

Ne iu bëjmë thirrje të gjitha palëve, që të ndërmarrin çdo përpjekje për të rinovuar Iniciativën e Kokrrave të Detit të Zi dhe të zbatojnë të dyja marrëveshjet në maksimum, duke përfshirë heqjen e përshpejtuar të çdo pengese të mbetur për eksportin rus të grurit e të plehrave. Ne theksojmë urgjencën për ta bërë këtë për të kontribuar në sigurinë ushqimore në të gjithë botën dhe për të zbutur vuajtjet që kjo krizë globale po u shkakton miliarda njerëzve.

Marrëveshja çliroi eksportet nga tre portet e Ukrainës, përkatësisht të Odesës, Chornomorskut dhe Yuzhnes, të cilat ishin bllokuar që nga koha kur Rusia nisi pushtimin e Ukrainës në fund të muajit shkurt.

Me këtë marrëveshje u lejua që një sasi e madhe prej afro nëntë milion tonësh drithëra të largoheshin nga të tre këta porte. Të dyja vendet, si Rusia dhe Ukraina janë furnizuese kryesore të drithërave në botë dhe konflikti i vazhdueshëm ka vënë në pah brishtësinë e zinxhirit global të furnizimit me ushqime, kur të dy shtetet kryesore janë jashtë tregut.

Vitin e kaluar, Rusia dhe Ukraina janë renditur si lidere globale në eksportet e elbit, misrit, luleve të verdha për vajra, farave të lulediellit dhe gjithashtu vajit të lulediellit. Së bashku, ato eksportojnë pothuajse 30 për qind të furnizimeve me grurë në botë. Rusia eksporton 17 për qind të grurit në nivel botëror, ndërsa Ukraina rreth 20 për qind të luleve të verdha për vajra.