Mbretëria e Bashkuar ka shënuar një fluks emigrantësh – rreth 500,000 kryesisht nga vendet jashtë Bashkimit Europian. Sipas vlerësimeve të Zyrës për Statistikat Kombëtare (ONS), Mbretëria e Bashkuar regjistroi mbërritjen e 504,000 njerëzve midis qershorit 2021 dhe qershorit 2022 .

Numri është rritur me 331,000 persona krahasuar me një vit më parë.

“Një seri ngjarjesh botërore kanë ndikuar në emigrimin e të huajve,” tha Jay Lindop, drejtor i qendrës ndërkombëtare të migracionit në ONS.

Faktorë të tillë si dalja nga BE, lufta në Ukrainë, pandemia, të gjithë kontribuan në numrin rekord të migrantëve. Konkretisht, 39% e emigrantëve kanë mbërritur në Britaninë e Madhe gjatë kësaj periudhe me vizë studentore dhe 21% me vizë pune.

Përveç shifrave të ligjshme të imigracionit, agjencia e Mbretërisë së Bashkuar vlerëson se 35,000 njerëz kaluan Kanalin ilegalisht në të njëjtën periudhë. Sekretarja e brendshme Suella Braverman, e cila i përket krahut të djathtë të konservatorëve, tha se qeveria britanike “kishte dështuar të kontrollonte kufirin”.