I Dërguari i BE-së për Dialogun Kosovë-Serbi, Mirosllav Lajçak foli lidhur me situatën e krijuar në veri të Kosovës duke theksuar se tensionet mbeten të larta. Sipas tij, niveli i mosbesimit është më i lartë se kurrë më parë, teksa shtoi se tani është e rëndësishme që të mos lejohet që situata të kthehet në një krizë tjetër. Për Politico-n u shpreh:

Me të vërtetë e rëndësishme tani është që të mos lejohet që situata të kthehet në një krizë tjetër dhe është e rëndësishme që liderët e Kosovës e Serbisë të fillojnë të krijojnë një atmosferë të favorshme për diskutime produktive për normalizimin e marrëdhënieve.

Afati i marsit ka për qëllim të përcjellë seriozitetin e arritjes së një marrëveshjeje dhe komuniteti ndërkombëtar po ndjen një urgjencë të shtuar për ta zgjidhur çështjen mes Kosovës e Serbisë. Kryeministri Albin Kurti dhe presidenti i Serbisë, Aleksander Vuçiç janë të gatshëm të takohen, por problem është rezultati.

Dy takimet e fundit ishin në rregull sa i përket atmosferës, por vizionet e dy liderëve nuk u përputhën. Ka gjithmonë pritshmëri të mëdha nga këto takime.

Cikli i përsëritur i tensioneve të ndjekura nga zgjidhje të përkohshme po i detyron negociatorët të angazhohen që ta shuajnë zjarrin, pasi nuk mund të përqendrohemi te normalizimi kur ka krizë.

Kështu që ndërsa kriza e fundit ka përfunduar tani e ndërsa ne flasim, unë shpresoj që brenda një jave, ne nuk do të përballemi me një krizë tjetër ose mund të harrojmë normalizimin. Tani për tani, ne kemi një strukturë shumë të favorshme: ne kemi vëmendjen e lidershipit të lartë në SHBA e BE, si dhe kemi bashkëpunim shembullor BE-SHBA, kështu që kjo është dritarja e vërtetë e mundësive, diku deri në dhjetor 2023 ose në fillim të 2024-ës.

Lajçak përmendi edhe zgjedhjet e Parlamentit Europian dhe zgjedhjet presidenciale në Amerikë që do të mbahen në vitin 2024, kur tha se afatet për marrëveshje do të harrohen nëse zgjidhja nuk arrihet deri atëherë.

Nëse gjërat nuk janë bërë deri atëherë, ne do të duhet të fillojmë përsëri nga e para. Nëse i kthehemi krizës dhe përplasjeve, atëherë mund të harrojmë afatet.