Një moment rrëqethës po bën xhiron e rrjetit ku një grua siriane, e bllokuar nën rrënojat e shtëpisë së saj të shembur, lindi një djalë dhe më pas fatkeqësisht ndërroi jetë. Pavarësisht kushteve më të pafavorshme, mjekët në zonën e Jindires, në veri të Aleppos, arritën të lindnin foshnjën dhe ta nxirrnin nga rrënojat për të siguruar mirëqenien e tij, por nuk mundën ta shpëtonin nënën.

Fëmija është i vetmi i mbijetuar në familje pasi të gjithë vëllezërit e motrat e tij humbën jetën. Lajmi për lindjen e foshnjës dhe vdekjen e nënës së tij u përhap shpejt dhe një video e një burri që mbante të porsalindurin e vogël larg nga rrënojat u bë virale në mediat sociale.

The moment a child was born 👶 His mother was under the rubble of the earthquake in Aleppo, Syria, and she died after he was born , The earthquake.
May God give patience to the people of #Syria and #Turkey and have mercy on the victims of the #earthquake#الهزه_الارضيه #زلزال pic.twitter.com/eBFr6IoWaW

— Talha Ch (@Talhaofficial01) February 6, 2023

Ndërsa bota mban zi për humbjen e mijëra jetëve në tërmet, historia e të porsalindurit preku zemrat e miliona njerëzve. Foshnja, e cila është quajtur “Mrekulli” nga ata që kujdesen për të, është kthyer në një simbol shprese dhe qëndrueshmërie përballë tragjedisë. Qyteti i shkatërruar nga lufta në Siri, Aleppo, është ndër zonat që kanë bartur peshën kryesore të tërmetit, i cili gjithashtu shkatërroi pjesë të Turqisë jugore.

Po vazhdojnë përpjekjet për të shpëtuar personat që besohet se kanë mbetur nën rrënojat e mijëra ndërtesave të shkatërruara nga tërmetet e fuqishme që goditën Turqinë dhe Sirinë. Rreth 5 mijë vetë raportohet se kanë gjetur vdekjen, pasi një tërmet i magnitudës 7.8 sipas shkallës Rihter goditi dje në orët e para të mëngjesit. Epiqendra ishte rreth 26 kilometra nga qyteti Nurdagi e afro 33 kilometra larg qytetit Gaziantep, siç njoftoi Shërbimi Gjeologjik amerikan.

Në Turqi, numri i viktimave nga tërmetet është rritur në 3.381. Orhan Tatar, zyrtar në Autoritetin për Menaxhimin e Fatkeqësive dhe Emergjencave tha se 20.426 persona të tjerë u plagosën dhe 5.775 ndërtesa ranë. Shifrat e reja bëjnë që numri i viktimave në Turqi dhe Siri të arrijë në 4.890. Në Siri, në zonat e kontrolluara nga qeveria, raportohen 812 viktima e 1.449 të plagosur në provincat Alepo, Lakatia, Hama, Idlib e Tartus.