Një video që ka bërë xhiron e rrjetit e që është publikuar së fundmi, tregon një lopë që bie nga një kamion i madh në mes të një autostrade të ngarkuar në Angli. Rrëzimi që shkaktoi rrëmujë në autostradën në West Midlands County pranë Birmingham u përsërit më pas rreth 3 kilometra më tutje kur një lopë e dytë ra nga kamioni, sipas raportit të policisë.

Dy lopët përfunduan duke u endur mes makinave dhe kamionëve, duke detyruar shoferët të devijojnë rrugën për të shmangur aksidentet, raportojnë mediat e huaja. Për to, rreziku ishte i lartë pasi automjetet në autostradë po lëviznin me shpejtësi të madhe.

Një kamion i madh u filmua duke u ndalur papritur teksa lopa e parë u rrëzua në rrugë. Një nga lopët e lënduara u fotografua duke qëndruar në rrugë teksa gjaku i rridhte nëpër këmbë. Një pjesë e rrugës mbeti e mbyllur në të dyja krahët për rreth 90 minuta pranë qytetit të Walsall ndërsa reaguesit e parë punuan për të grumbulluar kafshët në mënyrë të sigurtë.

Kenny Rogers, kamera e të cilit kapi kafshën e parë që u rrëzua, po udhëtonte drejt një ankandi kur ai shmangu përplasjen kokë më kokë me një lopë të shtrirë në rrugë.

Ju nuk e shihni këtë çdo ditë. Mendimi im i parë ishte të mos e godisja. Ishte një habi. Kur arrita në mënyrë të sigurt, i dërgova një mesazh gruas sime dhe i thashë “për pak sa nuk jam goditur nga një lopë që bie në autostradë”. Ajo nuk më besoi. Nuk mund të mendoj pse.

Autoritetet britanike kanë nisur hetimet ndaj personave që bartnin në mënyrë të pasigurt lopët me kamionë. Një zëdhënës i një kompanie që doli vullnetarë të largonte lopët nga vendi i ngjarjes tha se kafshët nuk pësuan lëndime kërcënuese për jetën dhe u tha se ishin “mirë”, raportoi The Sun.