Një ngjarje e rëndë ka ndodhur në SHBA, ku një 39-vjeçare kishte derdhur zbardhues në kafen e burrit të saj prej muajsh, i cili ishte pjesëtar i Forcave Ajrore Amerikane. Mediat e huaja shkruajnë se Melody Johnson është vënë në prangat e policisë, pasi burri i saj më parë i kishte ofruar autoriteteve pamjet video të saj duke hedhur zbardhues në aparatin e kafesë.

Bashkëshorti, i cili është në proces divorci, por jeton me gruan dhe fëmijën e tyre në të njëjtën shtëpi, vuri re në fund të marsit, ndërsa ishte në Gjermani se kafeja e tij kishte një shije të çuditshme. Ai vazhdoi të pinte kafen e tij, por kur ai testoi ujin në aparatin e tij të kafesë, ai tregoi “nivele të larta zbardhuesi”, sipas dokumenteve të gjykatës.

Kur ata u vendosën në një banesë, burri vendosi kamera, të cilat dukeshin si alarme zjarri, në lavanderi, ku mbahej zbardhuesi, sipër aparatit të kafesë dhe një të tretën midis dy hapësirave. Videot e reja tregonin 39-vjeçaren duke marrë zbardhues, duke e futur në një enë dhe duke shkuar për ta derdhur në aparatin e kafesë. Burri i tha policisë se ai besonte se gruaja e tij donte ta vriste për të mbledhur përfitimet e vejushës.