Pak ditë më parë në mediat online qarkulloi lajmi se ka nisur organizimi i “Festivalit të RTSH”, një prej evenimenteve artistike më të rëndësishme në vendin tonë e që con edhe përfaqësuesin e Shqipërisë në Eurovision.

E duke qenë se përgatitjen kanë nisur, janë zbuluar edhe emrat e prezantuesëve të Festivalit të këtij viti, bëhet fjalë për aktoren e njohur Almeda Abazi, e cila e ka prekur edhe më parë prezantimin në një tjetër festival dhe Xhani Shqerrën, moderatorin e programeve të stilit dhe jetës së bukur.

Ndërkohë sot, “Kryefjala” ka zbuluar jo vetëm skenaristin e këtij viti për netët e Festivalit, që mesa duket do të jenë Enkel Demi, por edhe disa prej artistëve pjesëmarrës.

Kështu, përflitet se do të kemi një rikthim në skenën e muzikës shqiptare, pikërisht në këtë eveniment të Vesa Lumës dhe partnerit të saj, reperit Big Basta.

Kujtojmë se Vesa bëri me dije disa kohë më parë se nuk do të vazhdonte jetën në Zelandën e Re, por do të qëndronte në Shqipëri, ku mesa duket do të rikthehet fuqishëm muzikës dhe ku më mirë se sa në Festivalin e gjithë shqiptarëve.

Kënga e tyre raportohet se do të jetë i zhanrit hip-hop, ndikuar edhe nga Big Basta, ndërsa kënga është pregatitur nga Alban Kondi.

Nga ana tjetër, një tjetër emër që do të ngjitet në skenën e Festivalit është Ardit Cuni, që thuhet se do të vijë me një këngë ritmike, por ende nuk dihen detajet.

Emra të tjerë të përmendur në media së fundmi janë:Vesa Smolica, Blerina Braka, Erma Mici, apo edhe Luiz Ejlli, ndërsa nuk dihet nëse këtë vit fituesi i Festivalit do të ndahet nga ai i përfaqësuesit së vendit tonë në Eurovision, formulë që u përdor vitin e shkuar për herë të parë.